Дар шаҳри Дубайи Амороти Муттаҳидаи Араб аз 3 то 5 феврали соли 2026 Саммити ҷаҳонии ҳукуматҳо баргузор гардид. 

Дар Саммити мазкур аз ҷониби директори Агентии хизмати давлатии назди Президенти Ҷумҳурии Тоҷикистон Илёс Идрисзода ва Вазири давлатӣ Дабири кулли Девони вазирони Амороти Муттаҳидаи Арабӣ Марям бинти Аҳмад Ал Ҳаммодӣ Ёддошти тафоҳум байни Ҳукумати Ҷумҳурии Тоҷикистон ва Ҳукумати Амороти Муттаҳидаи Арабӣ оид ба ҳамкорӣ дар самти табодули таҷрибаи идоракунии давлатӣ ба имзо расид.

Дар ин хусус АМИТ “Ховар” иттилоъ медиҳад.

Бино ба иттилои манбаъ, санади мазкур барои ба роҳ мондани ҳамкорӣ дар самти идоракунии давлатӣ, аз ҷумла ба ташкили табодули таҷриба оид ба амалисозии консепсияҳо, стратегияҳо ва дигар барномаҳои давлатӣ ҳамоҳангсозӣ ва арзёбии фаъолияти мақомоти давлатӣ дар низоми идоракунии давлатӣ ва хизматрасониҳои давлатӣ, рақамикунонии идоракунии давлатӣ, таъмини рушди иқтидор ва омодасозии кадрҳои идоракунии давлатӣ дар хориҷи мамлакат ва ҳамоҳангсозӣ барои баланд бардоштани рақобатпазирии идоракунии давлатӣ мусоидат менамояд.

Инчунин, гуфта мешавад, ки хизматчиёни давлатӣ барои таҳсил дар доираи Барномаи омодасозии кадрҳо дар хориҷи мамлакат, ки аз ҷониби Амороти Муттаҳидаи Арабӣ амалӣ карда мешавад, хизматчиёни давлатӣ ба хориҷи ҷумҳурӣ фиристода мешаванд.

Шаҳноза АЗИМОВА, коромӯзи “ҶТ”