Бо ин унвон Кумитаи меъморӣ ва сохтмони назди Ҳукумати Ҷумҳурии Тоҷикистон барои кормандони мақомоти ҳокимияти давлатии ВМКБ ва шаҳри Хоруғ семинари омӯзиширо баргузор кард.

Дар семинар муовини раиси Кумитаи меъморӣ ва сохтмон Низом Мирзозода, муовини раиси вилоят Анвар Иматшозода, муовини аввали раиси шаҳр Зуробек Бурибекзода, кормандони идораву муассисаҳои маҳалливу Бахши кор бо ҷавонон ва варзиши шаҳр иштирок намуданд.

Нахуст директори корхонаи воҳиди давлатии “Пажӯҳишгоҳи илмию тадқиқотии “Сохтмон ва меъморӣ” У. Умаров ва роҳбари корхонаи воҳиди давлатии “Маркази нархгузорӣ дар соҳаи сохтмон” А. Каримзода баромад намуда, оид ба ҳолати амали санадҳои меъёриву техникӣ, навгониҳои меъёрӣ дар соҳаи шаҳрсозӣ, ҳуҷҷатҳои иҷроишӣ дар сохтмон ва танзими нархгузорӣ дар соҳаи шаҳрсозӣ маълумот доданд.

Зикр гардид, ки меъёру қоидаҳои шаҳрсозӣ аз ҷониби мақомоти ваколатдори давлатӣ дар соҳаи меъморӣ ва шаҳрсозӣ сари вақт бояд таҳияву тасдиқ шаванд. Яъне қабули ин меъёрҳову қарорҳои дахлдор дар хусуси масъалаҳои ҳуқуқҳои соҳибмулкон, истифодабарандагони молу мулки ғайриманқул, ҳуқуқҳои шахсони воқеиву ҳуқуқӣ, ки ҳангоми фаъолияти шаҳрсозӣ манфиатҳои онҳо халалдор мегарданд, асоси воқеӣ шуда метавонанд.

Бо ҳадафи беҳтар кардани дастрасии санадҳои меъёрии сохтмон аз ҷониби КВД “Пажуҳишгоҳи илмию тадқиқотии “Сохтмон ва меъморӣ” барномаи махсусигардонидашудаи компютерии Системаи маълумотии "Иттилооти шаҳрсозӣ" тарҳрезӣ ва мавриди истифодабарӣ қарор дода шудааст.

Системаи мазкур дар як барномаи компютерӣ маълумоти меъёрӣ - техникӣ ва ҳуқуқии мутахассисони ташкилотҳои лоиҳакашӣ, сохтмонӣ, таъмирӣ, васлгарӣ, мақомоти назоративу иҷозатномадиҳии заруриро муттаҳид гардонидааст. Барнома маҷмӯи ҳуҷҷатҳои меъёрӣ: стандартҳои давлатӣ, меъёр ва қоидаҳои сохтмонӣ, дастуру тавсияҳои методӣ, фармоишу қарорҳо, мактубу дигар ҳуҷҷатҳои соҳаи сохтмонро ифода менамояд. Яъне Системаи маълумотии "Иттилооти шаҳрсозӣ" кормандони соҳаро аз ташвиши зиёд дар кофтукови ҳуҷҷатҳои зарурӣ, ки онҳо ҳамзамон нест мешаванд, озод менамояд ва танҳо ҳамаи санадҳо дар системаи "Иттилооти шаҳрсозӣ" доимо дастрас мебошанд.