Имрӯз, 6-уми сентябр дар рафти натиҷагирии даври II озмуни ҷумҳуриявии “ТАРАННУМИ ВАТАН” дар номинатсияи суруд танҳо се ҷойи ифтихорӣ барои қадрдонии ин номинатсия пешниҳод карда шуд.

Маросими натиҷагирии даври II озмуни ҷумҳуриявии “ТАРАННУМИ ВАТАН” дар толори маҷлисгоҳи КВД КТН “Шарқи Озод” бо иштироки 10 нафар аъзои комиссия аз сохторҳои гуногуни давлатӣ - Иттифоқи нависандагони Тоҷикистон, Вазорати фарҳанги Ҷумҳурии Тоҷикистон, Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Донишкадаи давлатии фарҳанг ва санъати Тоҷикистон ба номи М. Турсунзода, Консерваторияи миллии Тоҷикистон ба номи Т. Сатторов, ТМТ “Шаҳнавоз”, рӯзномаи “Ҷавонони Тоҷикистон” ва кормандони нашрияҳои давлатӣ баргузор гардид.

Ҳайати ҳакамон бинобар сабаби кам будани иштирокчиёни даври II озмуни ҷумҳуриявии “ТАРАННУМИ ВАТАН” аз рӯйи номинатсияи суруд, кам будани суруди нав, (ки яке аз шартҳои асосии озмун буд) ва ҳамзамон зиёдтар бозхонд шудани сурудҳо ва фаъол набудан дар марҳилаи якум (кам ҷалб намудани тамошобин ва фарогирӣ миёни ҷомеа) аз миёни 10 иштирокчӣ (дар умум 27 суруд ба унвонии озмуни мазкур пешниҳод шудааст), ки ба марҳилаи натиҷагирӣ пешниҳод шуда буд, баъди тамошою баҳогузорӣ танҳо се нафари онро барои ҷойҳои ифтихории якум, дуюм ва сеюми озмун пешниҳод карданд.

Ҳамин тавр, дар даври II озмуни ҷумҳуриявии “ТАРАННУМИ ВАТАН” дар номинатсияи суруд танҳо се нафар (ҷойҳои 1, 2 ва 3) қадрдонӣ карда мешаванд.