Зери ҳамин унвон дар шаҳраки Ваҳдати ноҳияи Шуғнони Вилояти Мухтори Кӯҳистони Бадахшон бо иқдоми шуъбаи маорифи ноҳия конфронси илмӣ – амалӣ баргузор гардид.

Дар конференсия мудирони бахши робита бо ҷомеаи дастгоҳи раиси ноҳия ва шуъбаи маориф Азиз Иброҳимов ва Мавлуда Бойназарзода, омӯзгорони мактабҳои таҳсилоти миёнаи умумиву ҷавонон вобаста ба масъалаи таҳкими тарбия дар оилаву МТМУ баромад намуданд.

Таъкид гардид, ки масъулияти падару модар дар таълиму тарбияи фарзанд аз масоили калидии ҷомеаи муосир ба шумор рафта, кору фаъолият бо он ғайрати дастаҷамъона мехоҳад. Зеро маҳз аз айёми хурдсолӣ кўдакон волотарин хислатҳои инсониро дар оила аз худ мекунанд. Аз ин лиҳоз, волидонро мебояд, ки фарзандонро дар муҳити солиму созгор ба камол расонанд, то фардо хонаводаҳои онҳо ва миллату давлат тавонад бо чунин фарзандон ифтихор кунад.

“Бо дарки ин масъулияти бузург таваҷҷуҳи Ҳукумати кишвар, хосса Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба соҳаи маориф беандоза буда, ба шарофати Истиқлолияти давлатӣ дар ноҳияи Шуғнон чандин муассисаҳои типи нав бунёд шуда, шароити таълиму тарбия беҳтару хубтар роҳандозӣ гардидааст”, - иброз намуд, Мавлуда Бойназарзода.

Гуфта шуд, ки агарчи фарзанд азизтарин шахс дар оила бошад ҳам, аммо одобу ахлоқи хуби вай аз ў азизтар аст. Аз ин рў, хонандагон бояд дар баробари омўхтани илму дониш ба одоб, рафтору гуфтор ва пиндори нек таваҷҷуҳи махсус равона карда, кўшиш намоянд, ки ҳаматарафа намунаи ибрат бошанд. Мутаассифона, солҳои охир баъзе падару модар танҳо ба донишомўзии фарзандон такя намуда, тарбияи фарзанд то андозае аз мадди назар дур шудааст. Бо ибораи возеҳ таълиму тарбия дар як мувозинат бояд бошанд.