Вазорати меҳнат, муҳоҷират ва шуғли аҳолии Ҷумҳурии Тоҷикистон дар соли 2022 зиёда аз 190 ҳазор ҷойҳои корӣ таъсис додааст, ки 37%-и он ҷойҳои кории доимӣ ба ҳисоб мераванд.

Гулнора Ҳасанзода, вазири меҳнат, муҳоҷират ва шуғли аҳолӣ 13-уми феврал зимни нишасти хабарӣ бо зикри ин нукта ҳамзамон таъкид кард, ки таъсиси ҷойҳои корӣ имконияти бакортаъминкунии шаҳрвандонро дар дохили кишвар зиёд гардонидааст.

- Танҳо бо мусоидати мақомоти меҳнат ва шуғли аҳолӣ дар дохили кишвар зиёда аз 74,5 ҳазор нафар шаҳрванди бекор ва муҳоҷирони меҳнатӣ ба Ватан бозгашта, ба ҷойҳои корӣ таъмин карда шуданд, - гуфт Ҳасанзода.

Ҳамчунин зикр гардид, ки тайи соли 2022 ба мақомоти меҳнат ва шуғли аҳолӣ 3,4 ҳазор нафар муҳоҷири меҳнатии ба Ватан бозгашта, муроҷиат намудаанд.

- Дар натиҷаи андешидани тадбирҳо 1,4 ҳазор нафари онҳо бо ҷойи кори доимӣ таъмин гардида, 340 нафар ба тайёрии касбӣ, 175 нафар ба иҷрои корҳои ҷамъиятии музднок сафарбар шуданд, - зикр намуд номбурда.