Имрӯз бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар Донишгоҳи давлатии тиббии Тоҷикистон ба номи Абӯалӣ ибни Сино конференсияи ҷумҳуриявии назариявӣ – амалӣ дар мавзӯи “Татбиқи самараноки сиёсати давлатии ҷавонон дар замони соҳибистиқлолии кишвар” баргузор гардид.

Конференсияи мазкур дар доираи ҷашни 34-солагии Истиқлоли давлатии Ҷумҳурии Тоҷикистон доир гардида, дар он намояндагони сохторҳои гуногуни давлатӣ, олимону муҳаққиқони ҷавон ва зиёда аз 1700 нафар ҷавонони фаъол иштирок намуданд.

Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон зимни баромади хеш таъкид кард, ки Истиқлоли давлатӣ ба мо имконият дод сиёсати давлатии ҷавононро бо самтҳои равшан ва барномарезии амиқ пеш барем. Ҳадафи асосии давлату Ҳукумат тарбияи ҷавонони созанда, ватандӯст ва соҳибмаърифат мебошад.

Ҳамчунин, Мирзоқосим Каримзода, муовини Раиси ҲХДТ баромад намуда, иброз дошт: “Мо-ҷавононро мебояд, ки дар атрофи Пешвои миллат ҷамъ омада, бо меҳнати софдилона ба халқу миллат хизмат намоем ва Истиқлоли кишварро гиромиву қадр кунем”.

Дар фарҷом чанде аз иштирокчиёни конференсия бо сипоснома, медал ва дигар туҳфаҳои арзишманд қадрдонӣ шуданд.

Г. КАРИМОВА, “ҶТ”