Пешвои миллат, ҳанӯз дар суханронии худ ба ифтихори 20-солагии баргузории Иҷлосияи шонздаҳуми Шурои Олии Ҷумҳурии Тоҷикистон даъвати рӯ овардан ба ҷавононро ба миён гузошта, таъкид намуда буданд, ки “Воқеан ҳам таваҷҷуҳ ба ҷавонон маънии рӯ овардан ба ояндаи кишвар ва миллатро дорад”.

Мехостам иброз намоям, ки ҷавонон дар ҳама давру замон қувваи асосӣ ва неруи бузурги бунёдгару созандаи давлату миллат буданд, ҳастанд ва мебошанд. Аз ин рӯ, чанд ҳазор сол муқаддам философи машҳур Арасту навишта буд: “Ҳама касоне, ки хусуси санъати идоракунии тафаккур намудаанд, бояд фаромӯш накунанд, ки тақдири империяҳо ба тарбияи ҷавонон вобастагӣ дорад”.

Бояд гуфт, ки Ҳукумати кишвар аз солҳои аввали соҳибистиқлолӣ ба ҷавонон таваҷҷуҳи хосса дошт. Ин буд, ки баъд аз шаш моҳи ба даст овардани Истиқлоли давлатӣ Қонуни Ҷумҳурии Тоҷикистон “Дар бораи сиёсати давлатии ҷавонон” ба тасвиб расид. Санади мазкур заминаҳои ташкиливу ҳуқуқии сиёсати давлатии ҷавононро муҳайё ва муайян намуд.

Хотиррасон бояд шавам, ки дар партави сиёсати ҷавонпарваронаи Пешвои муаззами миллат тули 10 сол дар самти ҷавонон ва варзиш фаъолият намуда, аз ин мактаби бузурги сиёсӣ дарси сиёсату ватандорӣ маърифату худшиносӣ ва пеш аз ҳама мактаби давлатдории Пешвои муаззами миллатро омӯхтем, ки дар фаъолияти корӣ бароям роҳи васеъ кушод.

Имрӯзҳо, ки ба ҳайси муовини раиси вилояти Хатлон фаъолият намуда истодаам, ба ҷавонон иброз менамоям, ки ватандӯстӣ ва меҳанпарастии ҷавонон дар давраи муосир аҳамияти хосса касб карда, ҳар як ҷавони бонангу номуси кишварро лозим ва зарур аст, ки ба омӯзиши илму дониш, касбу ҳунар машғул гардад, таърихи сипаригаштаи халқи худро, ки пур аз шебу фароз аст, донад, ба арзишҳои таърихию фарҳангии миллат арҷгузор бошад, арзиши ин миллати тамаддунофарро аз ҳама чиз қимат донад ва дар умум худшиносу худогоҳ бошад.

Фирӯза ШАРИФӢ,
муовини раиси вилояти Хатлон