Саридораи геологияи тоҷик дар шаш моҳи соли ҷорӣ бо 17 ширкат қарордоди истифодабарии қаъри замин ба маблағи 1003061,17 сомонӣ ба имзо расонидааст.

Дар ин бора, 15 июл, Илҳомҷон Оймуҳаммадзода, сардори Саридораи геологияи тоҷик зимни нишасти матбуотӣ ба рӯзноманигорон иттилоъ дода, дар идома гуфт, ки корҳои шартномавӣ аз рӯи 94 лоиҳа ба маблағи 7196940 сомонӣ иҷро гардидааст.

Ҳамчунин иброз гардид, ки дар ин давра барои иҷрои корҳои инкишофи геологӣ аз буҷет 1357893 сомонӣ ҷудо гардидааст. Саридораи геологияи тоҷик ба маблағи 2487577 сомонӣ ба буҷет андоз пардохт намудааст, ки ин 183%-и маблағҳои ҷудошударо ташкил медиҳад.

- Тибқи лоиҳаи “Хадамоти давлатии мушоҳидаи равандҳои экзогенӣ-геологӣ дар Тоҷикистон” дар ҳудуди вилоятҳои Хатлон, Суғд, ВМКБ ва ноҳияҳои тобеи ҷумҳурӣ дар 117 деҳа ва 2 шаҳрак тадқиқоти муҳандисӣ-геологӣ гузаронида шуда, дар натиҷа, ба 462 хоҷагӣ барои ба ҷойҳои бехавф кӯчонидан, тавсияҳо дода шудаанд,- гуфт, дар идомаи нишаст И. Оймуҳаммадзода.

 Садбарг СУЯРОВА, “ҶТ”