- Дар муддати шаш моҳ вазифаи асосии мақомоти ҳокимияти давлатии ВМКБ ин ба эътидол овардани вазъи сиёсӣ, таъмини сулҳу субот ва волоияти қонуну ҳар чи бештар наздик шудан бо мардуми вилоят буд ва дар ин росто албатта натиҷаҳо назаррасанд, - гуфт дар нишасти хабарӣ раиси ВМКБ Ёдгор Файзов.

 - Солҳои охир бо сабабҳои гуногун эътимоди баъзе сокинони вилоят нисбати мақомоти ҳокимияти давлатии вилоят то ҳадде коста гардид. Бо дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар муддати муайян ҳамаи кӯшишҳоро ба харҷ додем, то баҳри бартараф намудани камбудиҳои воқеӣ талош намоем ва ба боварии мардум сазовор бошем.

Дар ин давра асосан барои ҳазар кардан аз изофанависӣ дар ҳамаи соҳаҳои хоҷагии халқ, ба тартиб даровардани ҳисоботҳои нимсола ва ғайра мақомоти ҳокимияти давлатии вилоят аз ҳамаи идора, сохторҳои шаҳру навоҳии вилоят ҷиддияти хоссаро тақозо кард.

Дар масъалаи кишту кори баҳорӣ, ободонӣ ва тезонидани суръати сохтмонии вилоят тадбирҳои зарурӣ рӯи кор омаданд. Кишту кори баҳорӣ аз қабили кишти ғалладонаю сабзавот нисбати соли гузашта дар майдони 1300 гектар камтар шудааст. Вале ин маънои онро надорад, ки мо ягон порчаи заминро нисбат ба соли гузашта кам кишт кардем, балки ҳоло дар баъзе қитъаҳои алоҳида иншоотҳои гуногуни мавриди ниёзи мардум сохта мешаванд ва онҳоро аз қайди заминҳои корам баровардем, - зикр намуд раиси вилоят. 

Ҷабҳаи бузурги созандагиву бунёдкорӣ дар шаҳру навоҳии вилоят албатта аз ҳарвақта бештар тақвият ёфта, феълан дар шаҳру навоҳии вилоят маҳалла, кӯча ё деҳае нест, ки дар он корҳои созандагӣ сурат нагирифта бошанд ва дар ин росто давоми се соли охир, бахусус то ҷашни 30 – солагии Истиқлолияти давлатии Ҷумҳурии Тоҷикистон дар ВМКБ тағйиротҳои куллие рӯи кор хоҳанд омад. Вобаста ба масоили сохтмонӣ ҳоло таҳти раёсати муовини якуми раиси вилоят Алишер Мирзонаботов комиссияи махсус амал менамояд, ки рафту сифати корҳоро дар иншоотҳои гуногун назорат мекунад.

- Дар ин муддат таъмини буҷаи вилоят аз даромади худӣ 107 фисад иҷро шудааст ва ин нишондиҳандаи хуб аст. Вале дар маҷмӯъ агар онро то 150 фисад зиёд кунем ҳам, ин нишондиҳанда ҳанӯз кофӣ нест, зеро буҷаи кунунии вилоят фақат барои пардохти нафақаву ҳаққи маоши кормандон мерасад, на барои рушду пешрафти вилоят, - таъкид кард Ёдгор Файзов.

Давоми ҳисоботӣ таваҷҷӯҳи Ҳукумати кишвару шарикони рушд ба вилоят бештар шуда, баҳри беҳзистӣ, баланд бардоштани некуаҳволӣ ва сатҳу сифати зиндагии мардум бо дастгирии бевоситаи Пешвои миллат муҳтарам Эмомалӣ Раҳмон тариқи барномаҳои гуногун сараввал маблағи 30 000 000 доллар вориди вилоят гардид. Инчунин бо ҳадафҳои болозикр аз тарафи Бонки умумиҷаҳонӣ маблағи 12 000 000 доллар ва аз тарафи Оҷонсии Шветсария оид ба рушду Бонки таҷдид ва рушди Аврупо барои ВМКБ маблағи зиёда 8 000 000 евро ҷудо гардида, моҳҳои наздик созандагиву бунёдкорӣ дар вилоят вусъати тоза мегирад.

Ба кавли Ёдгор Файзов ҳоло дар вилоят бо ташаббуси Ҳукумати ҷумҳурӣ сохтмони зиёда аз 54 иншооти хурду бузурги варзишӣ дар ноҳияҳои Рӯшон, Ишкошим, Мурғоб, Ванҷ, Дарвоз, Роштқалъа, Шуғнон ва шаҳри Хоруғ бомаром идома дорад.

- Масъалаи таъмини ҳадафи чоруми стратегии кишвар, яъне саноатикунонии босуръат дар вилоят бошад дар сатҳи хеле паст қарор дорад. Яъне дар ҳолати кунунӣ танҳо ширкати барқии “Pamir energy” ва комбинати коркарди ғаллаи ноҳияи Шуғнон дар ин ҷода фаъолияти назаррас доранду халос. Бинобар ин, роҳи ягонаи таъмини ин ҳадаф дар вилоят рушд додани саноати кӯҳӣ буда, он бояд аз ҷониби Ҳукумати марказӣ дастгирӣ ёбад.