Ширкати ҳавопаймои миллии Тоҷикистон «Тоҷик Эйр» фаъолияти иҷтимоиашро дар соли нав аз иқдоми «Накӯӣ ҳадя намо!» оғоз менамояд, ки он ба дастгирии кӯдакони то 12-солаи мубталои бемориҳои онкологӣ ва қалб нигаронда шудааст.

«Тибқи анъанаи накӯ дар Соли нав одамон ба якдигар тӯҳфаҳо ҳадя карда, хабари хуш мерасонанд ва бо ҳамин восита табъи дӯстонашонро хуш мегардонанд. Тӯҳфаи беҳтарин барои ҳар кас солимӣ аст. Минбаъд аз ҳар чиптаи ҳавопаймои ширкати «Тоҷик Эйр» 2 сомонӣ гирифта, ба суратҳисоби Фонди хайриявии ширкат мегузаронанд, Маблағи дар натиҷаи иқдоми мазкур ғуншуда барои кӯмак ба кӯдакони 12-солае харҷ мегардад, ки мубталои бемориҳои онкологӣ ва қалб мебошанд. Мо ба оилаҳое кӯмак мерасонем, ки ба мо барои харидани доруворӣ муроҷиат мекунанд. Қаблан ба ҳамаи мусофирони «Тоҷик Эйр», ки дар ин кори хайр саҳм мегузоранд, ташаккур мегӯем», - гуфт сухангӯи ширкат Азиз Хайруллоев.    

«Тоҷик Эйр» мавқеи устувори иҷтимоӣ дошта, ба хонаҳои кӯдакон ва ташкилотҳои муҳтоҷ кӯмакҳои башардӯстона мерасонад. Дастгирии одамон яке аз самтҳои фаъолияти иҷтимоии ширкат аст. Зеро солимӣ, табъи болида ва саводнокии кӯдакон кафолати ояндаи нек аст.