Бо супориши Президенти Ҷумҳурии Тоҷикистон муҳтарам Эмомалӣ Раҳмон рӯзҳои наздик ба зарардидагони зилзилаи шадид дар давлати Сурия кумаки башардӯстона ба миқдори 50 тонна маҳсулоти зарурии хӯрокворӣ ва дигар навъи кумакҳои моддӣ фиристода мешавад.

Сироҷиддин Муҳриддин, вазири корҳои хориҷӣ 17 феврал зимни нишасти хабарӣ дар ин бора иттилоъ дода, ҳамзамон илова намуд, ки кумакҳои моддии мазкур иборат аз 10 тонна орд, 2 тонна равғани растанӣ, 12 тонна биринҷ, қанду макарониҳо, либосҳои зимистона, хаймаву болопӯш, лавозимоти антисептикӣ ва ғайра мебошад.

Таъкид гардид, ки ин кумакҳо ба зарардидагони офати табии кишвари Сурия расонида мешавад.

Ёдовар мешавем, ки дар пайи заминларзаи шадид, ки чанде пеш дар давлати Сурия ба қайд гирифта шуд, иншоотҳои зиёд харобу чандин нафар ба ҳалокат расиданд.

Чанде пеш ба кишвари Туркия низ, ки дар пайи заминларзаи мазкур зарари зиёд дид, Ҷумҳурии Тоҷикистон дар ҳаҷми умумии наздик ба 100 тонна кумаки башардӯстона намуда буд.