Арабистони Саудӣ рӯйхати кишварҳое, ки аз лиҳози вазъи эпидемиологӣ безараранд, тасдиқ намудааст, ки тибқи ин рӯйхат шаҳрвандони он кишварҳо метавонанд, ҷиҳати анҷом додани зиёрати ҳаҷ ба ин кишвар ворид шаванд.

Сулаймон Давлатзода, раиси Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон бо зикри ин нукта зимни нишасти хабарӣ ҳамчунин иброз дошт, ки Ҷумҳурии Тоҷикистон низ дар рӯйхати кишварҳои воридшаванда қарор дорад.

Зикр гардид, ки айни замон Кумита тибқи тартиб корҳои омодагиро барои сафарбарнамоии шаҳрвандон ба маросими ҳаҷ оғоз намудааст. Аз ҷумла, ҳиссаи ҷудошуда аз рӯи шумораи аҳолӣ тибқи мактуби Агентии омор ба шаҳру ноҳияҳои ВМКБ, вилоятҳои Суғду Хатлон, шаҳри Душанбе ва шаҳру ноҳияҳои тобеи ҷумҳурӣ барои оғоз намудани мавсими “Ҳаҷ-2020” ва пешниҳоди рӯйхати ҳаҷравандагон тақсим карда шуд. Рӯйхати ҳаҷравандагон аз ҷониби мақомоти иҷроияи ҳокимияти давлатии вилоятҳо ва шаҳру ноҳияҳои кишвар ба кумита пешниҳод гардид. Аммо бо назардошти вазъи пандемия сафари соли сипаришудаи зоирон бекор карда шуд. Аз ин рӯ, дар мавсими навбатӣ пеш аз ҳама онҳое сафар хоҳанд кард, ки тибқи навбат аз ҷониби мақомоти маҳаллӣ пешниҳод гардидаанд.

Исфандиёр АМАКҶОНОВ “ҶТ”