Ҷумҳурии Тоҷикистон тасмим дорад, рейтинги кишварро дар арсаи байналмилалӣ боз ҳам баланд бардорад. Дар ин бора маркази матуботи Вазорати корҳои хориҷӣ иттилоъ медиҳад.

Бино ба иттилои манбаъ, 9 ноябри соли 2022 дар Вазорати корҳои хориҷӣ таҳти роҳбарии муовини якуми Сарвазири Ҷумҳурии Тоҷикистон Давлаталӣ Саид ҷаласаи нахустини Комиссияи доимамалкунанда оид ба баррасӣ ва арзёбии мавқеи кишвар дар радабандиҳои байналмилалӣ баргузор гардид.

Гуфта мешавад, ки дар ҷаласа роҳбарони аввали вазорату идораҳои давлатӣ, мақомоти судӣ ва қудратӣ, ёрдамчии Президенти Ҷумҳурии Тоҷикистон оид ба масъалаҳои иқтисодӣ ва дигар аъзои Комиссия ширкат варзиданд.

“Мақсад ва вазифаҳои Комиссия, ҳайати он, гузориш оид ба радабандиҳои байналмилалӣ ва Нақшаи кори Комиссияи доимамалкунанда оид ба баррасӣ ва арзёбии мавқеи Ҷумҳурии Тоҷикистон дар радабандиҳои байналмилалӣ барои солҳои 2022-2023 баррасӣ гардида, аз натиҷаи он қарорҳои дахлдор қабул шуданд”,-омадааст дар хабар.

Ҳамзамон гуфта мешавад, ки дар ин ҷаласа муовини вазири корҳои хориҷӣ Шараф Шерализода оид ба мавқеи кишвар дар радабандиҳои байналмилалӣ гузориш додааст.

Ҳамчунин дар чорабинӣ роҳбарони намояндагиҳои дипломатӣ ва муассисаҳои консулии Ҷумҳурии Тоҷикистон дар хориҷа тариқи маҷозӣ иштирок намуданд.