Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон дар соли сипаришуда ҳудуди 1,5 ҳазор тонна маҳсулоти пастсифати ғизоиро аз муомилот берун кардааст.

Дар ин бора Темурҷон Абдулваҳҳобзода директори Агентии мазкур зимни нишасти матбуотӣ иттилоъ дод.

Ба гуфтаи мавсуф дар натиҷаи гузаронидани назорати давлатӣ ва санҷишҳо чунин миқдори маҳсулотро муайян карадаанд, ки қисми бештари ин маҳсулот (1 051 305кг.) аз ҷиҳати бехатарӣ ва қисми дигари он (385 338кг.) аз рӯи тамғагузаронӣ дар борҷомонааш аз муомилот берун шудаанд.

- Аз ҷумла, дар озмоишгоҳҳои ташхиси маҳсулоти ғизои Агентии “Тоҷикстандарт” аз рӯи сифату бехатарӣ ва тамғагузаронӣ 84 тоннаву 360кг. маҳсулоти гӯштӣ, 134 тоннаву 826кг. равғани растанӣ ва дигар намуди маҳсулот ғайристандартӣ дониста шудаанд, - гуфт Темурҷон Абдулваҳҳобзода.

Ба гуфтаи директори Агентӣ қисми зиёди маҳсулоти ғайристандартӣ дониста шуда, маҳсулоти воридотӣ ба ҳисоб мераванд ва мутобиқи тартиби муқарраргардида нисбат ба воридкунандадагони ин маҳсулот чораҳои маъмурӣ андешида шудааст.

Лозим ба ёдоварист, ки Ҳукумати кишвар барои пешгирӣ аз чунин ҳолатҳо ҷиҳати бештар кардани маҳсулоти содиротивазкунанда пайваста чораҳо меандешад. Президенти мамлакат муҳтарам Эмомалӣ Раҳмон дар маҷлиси васеи Ҳукумати Ҷумҳурии Тоҷикистон оид ба натиҷаҳои рушди иқтисодиву иҷтимоии кишвар дар соли 2023 бо мақсади амалисозии фаъолияти босуботи иқтисоди миллӣ, таъмин намудани бозори истеъмолӣ ва коҳиш додани вобастагии бозори дохилӣ аз молу маҳсулоти воридотӣ ба як қатор сохторҳои марбутаи Ҳукумат аз ҷумла вазоратҳои кишоварзӣ, саноат ва технологияҳои нав, энергетика ва захираҳои об супоришҳои мушаххас дода буданд.

Наҷиба МУРОДБЕКОВА, “ҶТ”