Бо мақсади рушди соҳибкорӣ дар соҳаи истеҳсолӣ ва беҳтар намудани сифати хизматрасонии субъектҳои хоҷагидор, дар ин замина муаррифии маҳсулоти ватанӣ, ҳавасмандгардонӣ ва қадрдонии соҳибкорони ватанӣ дар нимсолаи якуми соли 2023 озмуни "Маҳсулот ва хизматрасонии беҳтарин дар Ҷумҳурии Тоҷикистон" гузаронида шуд. Ҷиҳати иштирок дар озмуни мазкур дар миқëси ҷумҳурӣ 333 корхона ва ташкилоти хизматрасон дархост пешниҳод намуданд.

Ин нуктаро 2 август Темурҷон Абдулвахобзода, директори Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон зимни нишасти матбуотӣ баён намуд.

Ӯ ҳамзамон гуфт, аз шумораи умумии дархостдиҳандагон тибқи баҳогузории комиссияи вилоятӣ 115 корхонаю ташкилот ба даври ҷумҳуриявӣ роҳ ëфтанд.
"Санаи 3 июни соли 2023 дар Муассисаи давлатии "Боғи Ирам" маросими тантанавии супоридани ҷоизаҳо ба ғолибони озмуни "Маҳсулот ва хизматрасонии беҳтарин дар Ҷумҳурии Тоҷикистон" бо баргузории намоиш ва фурӯши маҳсулот доир гардид. Дар натиҷаи ҷамъбасти даври ҷумҳуриявӣ 49 корхонаи ватанӣ ва субъекти хизматрасон ба ҷоизаи махсус сарфароз гардонида шуданд.

Г. КАРИМОВА, "ҶТ"