Сомонаи телевизиони “Ҷаҳоннамо” фаъол гардида, дар муддати кутоҳтарин бо тарҳи нав фаъолияти худро ба роҳ мемонад.

Ин нуктаро имрӯз Шамсуддинзода Садриддин Зайниддин, директори телевизиони “Ҷаҳоннамо” зимни нишасти хабарии Кумитаи телевизион ва радиои назди Ҳукумати Ҷумҳурии Тоҷикистон зикр намуд.
Ҳамчунин ба саволи хабарнигори рӯзномаи “Ҷавонони Тоҷикистон” дар мавриди он ки “Ба истиснои телевизионҳои “Варзиш”-у “Футбол” чаро сомонаҳои дигар шабакаҳои телевизионӣ камфаъоланд?” раиси Кумитаи телевизион ва радио Нуриддин Саид дар посух гуфт:

“Мо барои фаъолияти хуб намудани сомонаҳои телевизионҳо воҳидҳои корӣ таъсис додаем ва онҳо бевосита дар ин самт кор мебаранд”. Инро раиси ин кумита дар ҳоле гуфт, ки имрӯзҳо фаъолияти сомонаҳои телевизионӣ на он қадар чашмрасанд.

Мавзуи дигаре, ки дар ин нишаст меҳварӣ буд, ин кушода шудани ду шабакаи телевизионии нав - телевизиони “Илм ва табиат” ва телевизиони “Сайёҳӣ ва ҳунарҳои мардумӣ” буд.

Нуриддин Саид вобаста ба он ки кай ин ду телевизион кушода мешавад, изҳор дошт, ки ин ду телевизион якеяш дар моҳҳои наздик ва дигараш то ахири сол таъсис дода мешавад.