Раҳим Саидзода, вазири маориф ва илми Ҷумҳурии Тоҷикистон зимни нишасти хабарии ниҳодаш аз он нигаронӣ кард, ки хонандагони муассисаҳои таҳсилоти умумии кишвар забони русиро хуб аз бар намекунанд.

- Мутаассифона то синфи 11 мехонанд, вале забони русиро намедонанд, - изҳор дошт Раҳим Саидзода вазири маориф ва илми кишвар.

Номбурда баён дошт, ки барои ҳалли ин мушкил айни замон аз ҷониби Вазорат барномаҳои нав ҷорӣ карда истодаанд, ки ҳам дар муассисаҳои томактабӣ ва ҳам дар муассисаҳои таълимии умумӣ ба роҳ монда мешавад.

- Дар мактаб бояд методикаи омӯзиш дигар карда шавад. Вақте ки хонанда забони русиро намедонад, грамматикаро аз худ кардан душвор аст.

- Мо аллакай омӯзиши забони русӣ ва англисиро дар муассисаҳои томактабӣ ҷорӣ карда истодаем. Мо бояд барномаҳоеро ҷорӣ намоем, ки дар дили хонанда завқро пайдо кунем ва хонанда худаш хоҳиши хондан пайдо кунад, - гуфт вазир.

Ҳамзамон зикр гардид, ки дар муддати ду соли ахир бо маблағгузории 20 миллион сомонӣ 54 китоби методӣ дар ин самт таҳия гардида, ба хонандагон пешниҳод шудааст.