Ӯ аслан духтури бемориҳои сил аст. Ҳамзамон тахассуси духтури бемориҳои даруниро ҳам дорад. Аммо барои пешгирии гирифтории аҳолӣ ба коронавирус имрӯз мисоли садҳову ҳазорҳо табибони дигари меҳан ӯ низ дар муқобили ин вабои марговар сангар гирифтааст.

Қаҳрамони мо, Салоҳиддини Сабоҳиддин, директори Маркази ҳимояи аҳолӣ аз бемории сили шаҳри Бӯстон аст.

- Табибӣ ишқ аст бароям. Маънои зиндагӣ ва зиннати он аст. Ҳар боре, ки беморе бо хости Худо ва ба сабаби талошҳоям шифо меёбад, эҳсос мекунам, ки узве аз бадани худам сиҳаттар шуду неруям бештар. Эҳсос мекунам, ки аз азал барои ҳамин роҳу кор офарида шудаам,-мегӯяд Салоҳиддин.

УМЕД БАХШИДАН АСОСИ ТАБОБАТ АСТ

Ба гуфтаи Салоҳиддин дар раванди табобат ёфтани ин беморӣ як чиз - дастгириву дилбардорӣ ба бемор неру мебахшад, то ӯ мубориза барад. “Муттаҳидии атрофиён дар канори бемор бошад, барояш омили хуби шифоие ҳам мешавад. Яъне дастгирии маънавию дилбардориҳо як сабаби асоситарини таъсири мусбат расонидан дар раванди табобат аст. Барои табобати гирифторони бемории коронавирус ҳам ин омилҳо таъсири бағоят бузург мегузоранд”,-мегуяд ӯ.

Ҳудуди 20 рӯз мешавад, ки Салоҳиддин ҳамроҳ бо тамоми ҳампешагонаш дар Маркази саломатии Кӯмаки аввалияи тиббии санитарии шаҳри Бӯстони вилояти Суғд барои пешгирӣ ва ҳимояи мардум аз коронавирус шабонарӯзӣ заҳмат мекашад. Воқеан ҳам мушкил аст 24 соати як шабонарӯзро бедорхобӣ кашидан ва мушкилтар, агар тақрибан ҳамин 24 соат ваҳму тарс бинӣ, оҳу нолаву дард бишнавию захму ҷароҳатҳои сангинро мушоҳида намоӣ. Ҳоло ҷойи андешаи бештар аст, ки чӣ гуна сахт мешавад, агар боз талош кунӣ, то як худат танҳо якеро бо суханҳои хушу умедворкунанда аз вартаи ваҳму тарс берун орӣ, барои дигаре давои дард диҳӣ, ҷароҳату захми сеюмиро пок созиву малҳам моливу гоҳе ҳам пораҳои бекоргаштаи гушти баданеро бурида партоӣ. Даҳшатро тасаввур кардед? То куҷо сабр карда тавонистед? Ҳоло акнун таҳсин ба ин фариштаҳои сафедпӯш намегӯем, ки кору рафтори рӯзмарраи зиндагияшон чунин аст. Дар моварои дарду азоби дигарон банд будану талош барои зафар бар дарду беморӣ. Кори табиб ҳамин аст.

“ТАВАССУТИ ТЕЛЕФОН МУҲОҶИРОНИ БЕМОРРО ТАБОБАТ КАРДАМ”

Салоҳиддин бо истифода аз донишҳо ва таҷрибаҳои андӯхтааш дар ин рӯзҳо хидмати бештар кардан ба мардумро барои амон ёфтан аз коронавирус масъулият ва қарзи касбияш медонад. Мегӯяд, барои он ки дар оянда мардуми шаҳр аз ин вабо дар амон монанд, талош мекунанд, ки ҳеч як муроҷиате беҷавоб намонад.

Ба ӯ аз гӯшаву канори шаҳри Бӯстон ва берун аз он ҳам занг мезананду тавсияҳо мегиранд. Мардум ба донишу фаҳмиш ва кордониву садоқати касбияш эътимод доранду бо нигоҳи нек менигаранд. Ҳамин аст, ки ҳатто гурӯҳе аз дӯстону наздиконаш, ки дар муҳоҷират қарор доранд, тамос мегиранду чӣ кор карданашонро мепурсанд.

“Дӯстони зиёде занг мезананду мепурсанд, ки чӣ кор кунанд, то ба коронавирус гирифтор нашаванд. Ман ҳам бо такя ба донишҳои тиббӣ тавсияҳо медиҳам, роҳҳои пешгириро мегӯям. Ҳатто чандин оилаҳои муҳоҷирбударо, ки гирифтори коронавирус буданд, ҳамарӯза тариқи телефон тавсияҳо медодам ва Худоро шукр, то имрӯз шумораи зиёде аз онҳо табобат ёфтанд. Дар ин раванд ман бештар аз дилбардорӣ ва умед бахшидан ба гирифторон кор гирифтам. Яъне бемории коронавирус табобатеро талаб мекунад, ки умедворӣ бахшидан ва дилбардорӣ кардан асоси он бошад”, - гуфт ӯ.

ТАБОБАТ ҲАМРОҲИВУ ҲАМДИЛӢ МЕХОҲАД

Ба таъкиди ин табиби ҷавон раванди табобати гирифторони коронавирус бидуни дастгирии мо духтарон ва ҳамзамон ҳамроҳиву ҳамдиливу дастгирии наздикони бемор сангин хоҳад буд. Қоидаҳои беҳдоштиро он гунае, ки муайян шудааст, риоя кардан лозим ва бо ҳар ҳарфу рафтори хеш ба онҳое, ки гирифтори ин вабо ҳастанд, умеду боварӣ бояд бахшид.

- Ҳар вақте як бемор шифо ёбад ин ба мо неру ва хурсандӣ медиҳад. Сараввал мо бояд тарсу ваҳмро аз сари худ дур намоем. Бигзор мардуми сарбаланди сарзаминамон ин шиори мо – кормандони соҳаи тиббро ҳаргиз фаромӯш накунанд: “Мо бо шумоем мардуми шарифи Тоҷикистон!”. Мо итминон дорем, ки албатта дар якҷоягӣ ба мақсад хоҳем расид ва бо хости Офаридгор миллатро аз вартаи дарду маризиҳо берун меорем,-мегӯяд Салоҳиддин.

Кормандони Муассисаи Кӯмаки аввалияи тиббии санитарии шаҳри Бӯстон дар якҷоягӣ ва бо роҳнамоии Салоҳиддини Сабоҳиддин ба ҳама аҳолӣ хидматҳои заруриро карда истодаанд.

Салоҳиддин мегӯяд: “Ҳар вақте беморе аз ман кумак пурсаду ман онро иҷро кунам, бениҳоят дилбастагиам нисбат ба касбам зиёдтар мегардад. Ба дӯстону бародароне, ки дар муҳоҷиратанд ва ман тариқи телефон ба онҳо сухбат мекунаму маслиҳату тавсияҳо медиҳам, бениҳоят худро хуб ҳис мекунам. Пас чӣ гуна метавон ин пешаро дӯст надошту лаҳзае худро дур аз хидмати мардуме тасаввур кард, ки ҳамеша мунтазир ва ниёзманди кумаки ту ҳастанд”.

ПАНДИ ПАДАР - ҚУВВАТИ ДИЛ

Аз рӯзе, ки бемории коронавирус дар кишвар рӯ зад, зиёд шунидему шоҳид шудем, ки иддае аз наздикону пайвандони табибон хоҳони аз кор даст кашидани онҳо шуданд. Аммо ин рафтор барои волидон ва наздикону пайвандони Салоҳиддини ҷавон ошноие надошту надорад. Атрофиён мудом таҳрикаш медиҳанд, ки устувор бимонад ва дасташ мегиранду аз хидматҳояш истиқбол мекунанд.

- Махсус волидонам ва аҳли оилаи ман хидмат ба мардумро ифтихор медонанд ва бо он ки дар ин ҷода устувор мондаам, хушҳоланду меболанд. Маро таъкиди падари меҳрубонам устувортар дар корам гардонд, - бо ифтихор гуфт ӯ.

Ин панд қуввати дилу илҳоми табиби ҷавон шуд, то дар ин ҷода устувортар қадам бимонаду мудом дар хизмати мардумаш бошад. Агар беморон ҳам ба дастгириву дилбардориҳо ниёзманданд, ниёзмандии табибон ба ин чизҳо камтар аз беморон нест. Фариштаҳои сафедпӯши мо лаҳза ба лаҳза ба ҳамроҳиву ҳамовозиву ҳамдилӣ ниёзманданд. Пас, биёед, қаҳрамонони даврони хешро бо ҳам дастгириву дилбардорӣ намоем. Биёед, ба фариштаҳои сафедпӯши ҷомеа бо ҳам арҷ гузорем.