Вазорати корҳои дохилии кишвар ба шаҳрвандон ҳушдор дод, то аз рафтан ба назди фолбинону ҷодугарон даст кашанд.

Ин ниҳод бо нашри як изҳорот дар сомонаи расмии худ аз бовару эътиқод доштани баъзе шаҳрвандон ба сеҳру ҷодуи фолбинону ҷодугарон ва рафтан ба назди онҳо нигаронӣ намуда, гуфт, ки минбаъд барои чунин нафарон аз сӯи вазорат чораандешӣ мегардад.

Акнун барои пешгирии қонуншиканиҳо дар қатори фолбинону ҷодугарон, ки ба фиреби мардум машғуланд, тамоми шаҳрвандони ба назди онҳо рафта низ ба Шуъбаҳои Вазорати корҳои дохилӣ даъват гардида, нисбаташон мавод тартиб дода мешавад ва дар махзанҳои ВКД бо расмҳояшон гузошта мешавад.

- Танҳо дар як моҳи охир зиёда аз 150 нафар чунин ашхос ба қайди Вазорати корҳои дохилӣ ворид гашта, нисбати онҳо чораҳои қонунӣ андешида шуда истодааст- омадааст дар изҳороти Вазорати корҳои дохилии кишвар.

Бояд гуфт, ки чанде пеш Раёсати вазорати корҳои дохилӣ дар шаҳри Душанбе иттилоъ дода буд, ки дар ҳашт моҳи соли равон танҳо дар пойтахт 141 нафар фолбину ҷодугар боздошт шуда, нисбаташон чораҳои зарурӣ андешида шудааст.

Ёдовар мешавем, тибқи тағйироти наве, ки ба моддаи 482 Кодекси ҳуқуқвайронкунии маъмурии Ҷумҳурии Тоҷикистон аз 21.06.2024 ворид гардид, барои машғул шудан ба фолбинӣ ба шахсони воқеӣ ба андозаи аз ҳаштод то 100 нишондиҳанда барои ҳисобҳо ҷарима ё ҳабси маъмурӣ ба муҳлати аз 10 то 15 шабонарӯз таъин карда мешавад.

Ҳамчунин ба моддаи 240-и Кодекси ҷиноятии Ҷумҳурии Тоҷикисон низ иловаҳо ворид карда шуд, ки дар асоси он нисбати фолбиноне, ки баъди татбиқи ҷазои маъмурӣ дар давоми сол такроран ба ин кирдор даст мезаданд, парвандаи ҷиноятӣ оғоз карда мешавад. Тибқи талаботи моддаи мазкур дар чунин ҳолат нисбати фолбинон ҷарима ба андозаи аз як ҳазору панҷсад то ду ҳазор нишондиҳанда барои ҳисобҳо ё маҳрум сохтан аз озодӣ ба муҳлати аз як то ду сол ҷазо дода мешаванд.