Табрикоти вазири мудофиаи Ҷумҳурии Тоҷикистон, генерал- полковник Шералӣ Мирзо ба ифтихори 27-умин солгарди Қувваҳои Мусаллаҳи Ҷумҳурии Тоҷикистон

Боиси шукргузориву фараҳмандист, ки бо ба даст омадани Истиқлолияти давлатӣ бо талошҳои Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон давоми 28 соли соҳибистиқлолӣ дар тамоми соҳаҳои ҳаёти кишвар дигаргуниҳои азим ба вуқуъ омаданд.

Таъсис ёфтани Қувваҳои Мусаллаҳ дар таърихи навини Ҷумҳурии Тоҷикистон дар баробари ба даст овардани Истиқлолияти давлатӣ мавқеи басо хоса дорад. Зеро Артиши миллӣ яке аз рукнҳои асосии давлатдорӣ, кафили соҳибихтиёрӣ, тамомияти арзӣ, неруи таъминкунандаи амнияту субот ва ҳифзи манфиатҳои милливу давлатӣ ба ҳисоб меравад.

Дар ин муддати барои таърих начандон тӯлонӣ, яъне дар 27 сол ҷузъу томҳои Қувваҳои Мусаллаҳи кишвар якчанд марҳиларо бомуваффақият паси сар намуданд. Аз ҷумла, ташкилу фаъол намудани мақомоти ҳарбӣ, қисмҳои низомӣ ва дигар муассисаву идораҳои Қувваҳои Мусаллаҳ чун як давраи муҳим бомуваффақият анҷом ёфт.

Бо итминони комил метавон гуфт, ки Қувваҳои Мусаллаҳи кишвар тӯли 27 сол аз бисёр имтиҳону озмоишҳои сахту сангин бо сари баланд гузашта, дар ин муддати кӯтоҳ ба як сохтори муташаккил, муназзам ва боэътимод табдил ёфт. Имрӯз бо талошҳои Сарвари муаззами кишвар, Сарфармондеҳи олии Қувваҳои Мусаллаҳи кишвар, генерали Артиш муҳтарам Эмомалӣ Раҳмон ҷузъу томҳои Қувваҳои Мусаллаҳи кишвар рисолати басо бузурги ба зимма доштаашонро сарбаландона иҷро намуда истодаанд.

Дарвоқеъ, шароити пешрафти босуръати ҷаҳонӣ тақозо менамояд, ки дар тамоми соҳаҳои кишвар, минҷумла соҳаи ҳарбӣ таҷрибаи пешқадамро ҷорӣ намоем. Ҳамин аст, ки бо ҳидояту талошҳои бевоситаи Сарфармондеҳи олии Қувваҳои Мусаллаҳи Ҷумҳурии Тоқикистон, Вазорати мудофиа аз таъсисёбии Артиши миллӣ ба барпо намудани ҳамкориҳои судманди ҳарбӣ ва ҳарбӣ-техникӣ шуруъ карда, дар ин муддат ба натиҷаҳои назаррас ноил гардид.

Воқеан, мақом ва обрӯю эътибори Қувваҳои Мусаллаҳ ва сатҳи омодабошии ҷангии ҳайати шахсӣ дар ҳар давру замон аз маърифати ҳуқуқӣ ва таълиму тарбияи хуби афсарону сарбозон, сайқал додани донишҳои сиёсиву низомӣ ва ба эҳсоси баланди ватандӯстиву садоқатмандии хизматчиёни ҳарбӣ вобастагии зиёд дорад.

Масъалаи таълиму тарбияи мутахассисон ва кадрҳои баландихтисос пайваста дар мадди назари роҳбарияти Вазорати мудофиа қарор дорад. Боиси хурсандист, ки бо таъсис додани Донишкадаи ҳарбии Вазорати мудофиа барои тарбияи кадрҳои афсарӣ дар дохили кишвар имкон пайдо шуд ва имрӯз хатмкунандагони ин муассисаи таҳсилоти олии низомӣ дар ҷузъу томҳои низомӣ адои вазифа карда истодаанд. Илова бар ин, ҳамасола афсарон ва курсантони тоҷик ба муассисаҳои таҳсилоти ҳарбии Федератсияи Русия, ҷумҳуриҳои Қазоқистон, Озарбойҷон, Ҳиндустон, Чин, Британияи кабир, Канада, Ҷумҳурии Федеролии Олмон, Фаронса ва Амрико баҳри таҳсил, бозомӯзӣ ва баланд бардоштани малакаи касбӣ фиристода мешаванд. Айни ҳол, дар муассисаҳои олии таълимии ҳарбии кишварҳои хориҷ наздики 800 нафар таҳсили илми низомӣ менамоянд, ки ҳайати онро курсантону шунавандагони академияву омӯзишгоҳҳои олии ҳарбӣ ташкил медиҳанд.

Зикр кардан зарур аст, ки хизматҳои шоёни ҳайати шахсӣ ҳеҷ гоҳ аз мадди назари роҳбарияти давлат дур намемонад. Ҳамин аст, ки бо Фармони Президенти мамлакат дар тӯли 27 соли сипаригашта шумораи зиёди афсарону прапоршикон ва сарбозони Вазорати мудофиа барои шуҷоату ҷасорат, хизмати бенуқсон, ҳангоми иҷрои вазифаҳои хизматӣ бо мукофотҳои давлатӣ, рутбаҳои олии ҳарбӣ ва унвонҳои фахрӣ қадрдонӣ гардиданд.

Инчунин, дар давоми ин солҳо дар ҳудуди ҳамаи вилоятҳо ва пойтахти кишвар шумораи муайяни хизматчиёни ҳарбӣ ва оилаҳои онҳо бо манзили зист таъмин гардиданд ва бунёди хонаҳои истиқоматӣ ё худ шаҳраки низомиён барои афсарону оилаҳои онҳо давра ба давра идома дорад. Илова ба ин, ҳамасола дар арафаи ҷашну идҳои давлатӣ тариқи иловагӣ аз ҷониби Президенти кишвар ба хизматчиён манзилҳои истиқоматӣ ҷудо карда мешавад.

Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пайваста таъкид менамоянд, ки воқеоту таҳаввулоти ҷомеаи мухталифи ҷаҳонӣ ҳар яки моро ҳушдор месозад, ки зиракии сиёсӣ, омодагии доимӣ, эҳсоси баланди ватандӯстӣ, худогоҳӣ ва муқаддас доштану ҳифз намудани ҳама арзишҳои истиқлолияти давлати куҳанбунёдамонро аз даст надиҳем. Чунки вазъи зудтағйирёбандаи ҷаҳони муосир, зиёд гардидани равияву ташкилотҳои тундрави террористиву экстремистӣ ва дигар зуҳуроти таҳдидовари хатарнок метавонад сулҳу субот ва ҳаёти орому осудаи мардумони кишвари моро халалдор намояд. Албатта, ин таъкиди Президенти Ҷумҳурии Тоҷикистон муҳтарам Эмомалӣ Раҳмон имрӯз аз ҳар вақта бештар аз ҳар як нафар хизматчиёни ҳарбии Қувваҳои Мусаллаҳ масъулияти баландро талаб менамояд.

Тавре маълум аст, имрӯз сиёсати хориҷии давлати мо ба ҳалли мушкилию баҳсҳои минтақавӣ, ҷаҳонӣ танҳо бо роҳи гуфтушунид ва дипломатӣ равона шуда, ҷонибдори ҳамкорию муносибатҳои неки сиёсӣ, иқтисодӣ, фарҳангӣ бо ҳамсоягони худ ва ҷаҳон аст. Дар ин раванд хизматчиёни ҳарбии Қувваҳои Мусаллаҳ ва кормандони мақомоти ҳифзи ҳуқуқ вазифадоранд, ки барои ҳимояи марзу буми давлати соҳибистиқлоламон ва ҳифзи суботи сиёсӣ, ҳалли баҳсҳои минтақавӣ доим омода бошанд. Мураккаб шудани манфиатҳои иқтисодию сиёсии ҷаҳони имрӯз ҳар як сокини кишварро дар баробари мақомоти ҳифзи ҳуқуқ бояд бетараф нагузоранд.

Итминони комил дорам, ки афсарону сарбозони шуҷои Қувваҳои Мусаллаҳи кишвар ба савганди ҳарбии худ ҳамеша содиқ монда, рисолати фарзандии худро дар назди Ватан-модар ва халқу давлати хеш минбаъд низ бо сарбаландӣ адо мекунанд ва тамоми донишу таҷриба, малакаву маҳорати худро ба хотири ҳифзи дастовардҳои истиқлолияти давлатӣ сафарбар месозанд.

Таъсиси 27-умин солгарди Қувваҳои Мусаллаҳи Ҷумҳурии Тоҷикистон муборак, афсарону сарбозони шуҷои Ватан!