Дар Тоҷикистон шурӯъ аз 23-юми марти соли равон, маъракаи эмкунӣ (ваксинатсия) бо ваксинаи “AstraZeneca”, ки бар зидди коронавируси COVID-19 равона гардидааст, идома дорад. Ин маърака бо як қарори Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки рӯзи 22-юми март ба имзо расид, оғоз шуд.

Бар асоси қарори мазкур, ниҳодҳои гуногуни кишвар вазифадор шудаанд, ки дар раванди эмкунӣ ба Вазорати тандурустӣ ва ҳифзи иҷтимоии аҳолӣ кумак кунанд ва вазорат баъд аз 15 рӯзи ҳар марҳила ба ҳукумат гузориш диҳад.

Гуфта мешавад, ки пеш аз ҳама ваксина бар зидди бемории COVID-19-ро кормандони соҳаи тандурустӣ, бахшҳои стратегии хоҷагии халқ, сокинони аз 60-сола боло, шахсони гирифтори бемориҳои музмини ғайрисироятӣ ва кормандони соҳаи маориф ва илм мегиранд.

Аввалин шуда Осама Маккавӣ, раҳбари Намояндагии бунёди кӯдакони Созмони Милали Муттаҳид (ЮНИСЕФ) дар Тоҷикистон дар бемористони “Истиқлол”-и шаҳри Душанбе ваксинаи “AstraZeneca”-ро гирифт. Ӯ низ ба расонаҳо гуфт, бо ин иқдомаш хост, нишон диҳад, ки ин навъи ваксина зараровар нест. Пас аз ӯ, вазири тандурустӣ, ду муовинаш ва масъулони дигари бахши тандурустии кишвар низ ваксина гирифтанд.

“AstraZeneca” ваксинаест, ки бар зидди коронавирус равона гардидааст ва як қатор кишварҳои аврупоӣ пас аз огоҳӣ ёфтани хабарҳо дар бораи лахташавии хуни баъзе нафарон аз истифодаи ин ваксина муваққатан даст кашиданд. Вале ширкати “AstraZeneca” ва ҳамзамон Созмони Ҷаҳонии Тандурустӣ иттилоъ доданд, ки лахташавии хуни муштариён баъд аз қабули ваксинаи “AstraZeneca” ғайриимкон аст.

Вале то ба ҳол сарусадаҳое миёни мардум аст, ки гӯё ваксинаи “AstraZeneca” зиёновар аст. Вале дар баробари ин шаҳрвандон ба он бовар доранд ва омода ҳастанд, ки аз ваксинаро гузаронанд.

Сунбула Насимова яке аз он нафаронест, ки омода аст, ки дар натиҷаи санҷиш аз эмкунӣ гузарад. Ба гуфтаи ӯ ин ваксина, ки ба Тоҷикистон ворид гардидааст ва Созмони Ҷаҳонии Тандурустӣ ва Вазорати тандурустӣ ва ҳифзи иҷтимоии аҳолии кишвар аз боэътимод будани он ҳарф мезананд, ҷойи шакку шубҳае нест.

“Тӯли чанд вақти охир мо тариқи расонаҳои кишвар мебинему мешунавем, ки Вазорати тандурустӣ моро барои гирифтани ваксина даъват мекунад ва то ҳол, ягон ҳолати ҷиддие рух надодааст. Аз ин хотир, фикр мекунам, он бехатар аст ва гирифтани он ба нафъи худи мо хоҳад буд”, -мегӯяд, ҳамсуҳбати мо.

Раёсати Шӯрои уламои Маркази исломии Ҷумҳурии Тоҷикистон рӯзи 29-уми март дар сомонаи худ бо нашри як муроҷиатнома аз мардум даъват намуда гуфт, ки эмгузаронӣ (ваксинатсия) ягона роҳи нигаҳдории солимии миллат буда, бепарвоӣ оқибати ногувор дорад.

Дар муроҷиати ин ниҳод гуфта мешавад, ки баъзе инсонҳо вокуниши ғайрифаъолро ба даъвати эмгузаронӣ бо баҳонаи он ки баъзе доираҳои хориҷӣ ба воситаи эмгузаронӣ мехоҳанд ба мардум зарар расонанд, тарғиб мекунанд.

“Ин сароҳатан муносибати ғалат аст, ки аз саъю талоши хидмат ба манфиатҳои беҳтарини мардум ва ҷомеаҳо ҷудо мебошад. Чунин муносибат ба яке аз ду сабаб ишора мекунад: ин ё натиҷаи ҷаҳолат ва нодонии аҳкоми шариат аст, ё ин ки натиҷаи адами огоҳӣ аз оқибатҳои хатарноки вогузорӣ ва тарки эмгузаронӣ”.
Ҳамчунин Шӯрои уламо илова намудааст, ки табибон ва коршиносони соҳаи тиб таъкид менамоянд, ки ҳамаи ваксинаҳо таҳти назорати созмонҳои байналмилалӣ, аз ҷумла Созмони Ҷаҳонии Тандурустӣ қарор доранд ва аз ҳама гуна санҷишҳо гузаштаанд.

Саидзода Файзалӣ, директори генералии Муассисаи давлатии маркази ҷумҳуриявии профилактикаи Вазорати тандурустӣ ва ҳифзи иҷтимоии аҳолии кишвар гуфтаҳои болоро тасдиқ намуда, мегӯяд то ба имрӯз дар муассисаҳои тиббии шаҳри Душанбе 13 ҳазору 584 нафарро ба эмкунӣ фаро гирифтаанд, ки ягон ҳолати номатлуб ба амал наомадааст. Ба гуфтаи ин масъули вазорат то ҳол 26 ҳазору 273 нафар кормандони тиб аз эмкунӣ гузаштаанд.

- Эмкунии “AstraZeneca” дар зиёда аз 90 давлати дунё сурат мегирад ва ягон ҳолатҳои номатлуби ҷиддие, ки ба фавт оварда мерасонад, ба қайд гирифта нашудааст. Ва он ҳолатҳои фавте, ки дар дигар кишварҳо буданд, он ба бемориҳои ғайрисироятии музмине, ки худи беморон доштанд, вобастагӣ дошт. Новобаста аз гузаронидани ваксина, ҳамарӯза дар кишвар фавт ба қайд гирифта мешавад. Мардуми мо фикр мекунанд, ки ба воксина вобастагӣ дорад, вале чунин фикр нодуруст аст, - гуфт, ҳамсуҳбати мо.

Гирифтани ваксина дар Ҷумҳурии Тоҷикистон ихтиёрӣ ва ройгон мебошад. Ҳукумати кишвар мегӯяд, барои фаҳмондани моҳияти ваксина ва бехатар буданаш маъракаи таблиғотиро тавассути ВАО-и кишвар ва тариқи фаҳмондадиҳӣ ба роҳ мондаанд.

Интизор меравад, ки Тоҷикистон ваксинаҳои дигар, аз ҷумла “Спутник V”-ро аз Русия харидорӣ намояд. Тоҷикистон дарёфти ваксинаи “Pfizer”-ро рад кардааст, чун ба гуфтаи мақомот шароити нигоҳ доштанашро надоранд.

Бино ба иттилои масъулони Вазорати тандурустӣ ва ҳифзи иҷтимоии аҳолии кишвар то имрӯз 13308 нафар ба бемории СОVID-19 гирифтор шуда, дар пайи он 90 нафар ҷони худро аз даст додаанд.