Давоми нимсолаи якуми соли 2025 аз ҷониби Кумита ва ташкилотҳои ҷамъиятии федератсияҳои варзишии кишвар 289 варзишгар, аз ҷумла 45 бонуи узви дастаҳои мунтахаби Ҷумҳурии Тоҷикистон аз намуди варзиши олимпӣ ва ғайриолимпӣ ба 72 мусобиқаи сатҳи байналмилалии варзишӣ дар хориҷи кишвар иштирок намуданд.

Дар ин бора Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон имрӯз якуми август зимни нишасти матбуотӣ хабар дод.

Дар идома раис қайд кард, ки натиҷаи иштироки фаъолонаи варзишгарон дар мусобиқаҳои байналмилалӣ ба хазинаи варзишии кишвар 238 медал, аз ҷумла 67 тилло, 74 нуқра ва 97 биринҷӣ ворид гардид, ки нисбат ба ҳамин давраи соли 2024, 31 медал зиёд мебошад (нимсолаи якуми соли 2024, 207 медал, аз ҷумла 55 тилло, 52 нуқра ва 100 биринҷӣ).

Инчунин, дар нишаст иттилоъ дода шуд, ки аз ҷониби дастгоҳи марказии Кумита дар доираи нақшаи ягонаи тақвимии чорабиниҳои тарбияи ҷисмонӣ ва варзишӣ дар Ҷумҳурии Тоҷикистон барои соли 2025, давоми шашмоҳа 60 чорабинии варзиши касбӣ бо фарогирии 4314 нафар варзишгарон, аз ҷумла 419 нафар бонувон баргузор гардид.

Илова бар ин, 15 мусобиқаи байналмилалии дӯстона бо иштироки варзишгарони Қирғизистону Узбекистон ва Эрон дар вилояти Суғд моҳи марти соли ҷорӣ баргузор гардид, ки дар он беш аз 900 варзишгар иштирок варзиданд.

Дар маҷмуъ, аз ҷониби дастгоҳи марказии Кумита, сохторҳои маҳаллӣ ва муассисаҳои тайёрии варзишии шаҳру ноҳияҳои ҷумҳурӣ 5312 чорабинии варзиши касбӣ бо фарогирии 168 643 варзишгар баргузор шудааст, ки нисбат ба ҳамин давраи соли 2024 аз лиҳози чорабинӣ 102 адад ва аз лиҳози фарогирӣ 68 942 нафар варзишгар зиёд мебошад.

Я. МАҲМАДНАБИЕВ, “ҶТ”