Варзишгарони ВМКБ дар мусобиқаҳои вилоятӣ ва ҷумҳуриявию байналмилалӣ натиҷаи дилхоҳ нишон дода, дар маҷмуъ 318 медалро соҳиб гаштанд, ки 78 ададашро тилло ташкил медиҳад.

Ин нуктаро Мирзонабот Алишер Худобердӣ, раиси Вилояти Мухтори Кӯҳистони Бадахшон зимни нишасти матбуотӣ ба хабарнигрон гуфт.

Таъкид гардид, ки соли сипаригардида дар ҷараёни ташрифи навбатӣ ва таърихии Пешвои миллат муҳтарам Эмомалӣ Раҳмон ба шаҳру ноҳияҳои вилоят аз ҷониби Роҳбари давлат 23 объекти муҳими таъиноти гуногун ва дар ҳошияи он бошад, 76 иншоот ба истифода дода шуд.

Бино ба гуфти раиси Вилоят дар заминаи эълон намудани солҳои 2022-2026 “Солҳои рушди саноат” ба бунёди корхонаҳои истеҳсолӣ диққати зарурӣ дода шуда, дар вилоят 24 корхона ва коргоҳҳои саноатӣ, бо таъсиси 220 ҷойи нави корӣ мавриди истифода қарор дода шуда, соли ҷорӣ бошад, тасмим гирифта шудааст, ки боз 40 объекти дигари соҳа, яъне коргоҳу корхонаҳои саноатӣ бо таъсиси зиёда аз 700 ҷойҳои нави корӣ бунёду таъсис ёбад.

- Дар ин давра маҷмуӣ маҳсулоти саноатӣ ба 204,5 млн. сомонӣ баробар гардид, ки ин 24,5 фоиз нисбати соли 2022 зиёдтар мебошад. Соли 2023 танҳо барои соҳаи сохтмон, аз ҳамаи манбаъҳо, 1 млрд. 253,7 млн. сомонӣ, яъне зиёда аз 2 баробар маблағ зиёд ҷудо ва истифода гардида, 423 иншоот ба истифода дода шуданд, ки ин дар соҳаи сохтмон бесобиқа мебошад, - гуфт раиси вилоят.

Ба таъкиди номбурда тибқи нақша-чорабиниҳои таҷлили сазовор аз 35-солагии Истиқлоли давлатӣ, дар ду соли охир 670 объект сохта, ба истифода дода шуд, ки 57 фоизи нақшаро ташкил медиҳад.

Мирзонабот Алишер Худобердӣ, раиси ВМКБ иброз дошт, ки барои иҷрои нақшаи даъвати ҷавонписарон ба сафи Қувваҳои Мусаллаҳи Ҷумҳурии Тоҷикистон низ фаъолият хуб ба роҳ монда шуда, нақша дар рӯзи якум сарбаландона иҷро гардид. Ин анъанаи нек минбаъд низ давом дода мешавад.

Садоншо ҶАНОБИЛШОЕВ, “ҶТ”