ҶОМЕА
Чоршанбе 13 Ноябр 2019 04:49
4361
Рӯзи ҷумъа баъди кор ба хона мерафтам, ки падарам занг зад.

- Хубӣ, бачам? Кору борат нағз? – пурсид баъди салому алейк падар.

- Шукр, падар, ҳама нағз. Шумо чи хел? Корҳотон нағз, дар хона тинҷӣ?

- Ҳама хуб...

Баъд аз суҳбату ҳолпурсиҳо падарам ниҳоят масъалаи асосиро пурсид:

- Ҳо, як вақт барои ман дар фейсбук саҳифа кушода будӣ-ку?..

- Бале, падар, кушода будам.

- Мешавад, ки ҳамона фаъол кунем. Ман чанд вақт боз истифода набурдам, рамзашро дар ёд надорам.

- Ман ҳам шаш моҳ боз истифода намебарам, падар. Як машғулияти зиёдатӣ, чи лозим...

- Не, не, вай фейсбук буданаш даркор. Имрӯз ба мо дар бораи муҳимияти саҳифа доштан дар фейсбук маҷлис карданд. Ҳафтаи гузашта ҳам ба мактаб ба маҷлиси падару модарон даъват карданд. Яке аз мавзуъҳои маҷлис ҳамин фейсбук буд. Ҳатто аз додарчаат таъриф карданд, ки талабаи фаъоли мактаб аст. Фейсбук дорад...

- О, додарам ҳоло синфи ҳафт-ку?

- Бале, дар ҳамон маҷлис гуфтанд, ки барои фейсбук синну сол аҳамият надорад. Муҳим ки он ҷо саҳифа дошта бошиву нишон диҳӣ, ки аз замон қафо намондаӣ...

- Аа-а... – мад кашидам ман ба “муҳимият”-и фейсбук сарфаҳм рафта. - Хуб, падар, агар ин қадар муҳим бошад, ман бароятон саҳифаи нав кушода медиҳам.

- Ҳа, боз гуфтанд, ки ҳар кас рамзаша танҳо худаш донистанаш даркор. Ин ба хотири ҳифзи маълумоти шахсӣ аз ҳар гуна бадхоҳон шарт будааст.

- О, нагуфтед, ки чи гуна ҳифзи маълумот будааст, ки одамон тамоми маҳрамияташонро бо дасти худашон пешкаши мардуми дунё месозанд?

- Чи хел, писарам?

- Ба осонӣ. Масалан, нав фарзанд ёфтагӣ одам зуд сурати навзоди ҳоло якрӯза нашударо ба саҳифааш мемонад. Мазмун, мана бинед, шери нари моро ё нафаре худашро дар сари табақи хӯрок сурат гирифта менависад: “Қурутоби олиҷаноб хӯрдем...”

- Ҳа-а. Ба ҳар сурат барои ман якта саҳифа кушода деҳ. Лекин зайле шавад, ки рамзаша танҳо худам донам.

- Хуб, падар, рамзаша танҳо ба худатон мегӯям...

Дар телефон бо падар хайрухуш кардем. То хона қариб расидам. Хона нарафта, аввал ба мағоза даромадам... Аҷиб, ки дар мағоза ҳам ду ҷавони фурӯшанда дар бораи кадом навори шабакаи фейсбук ҳарф мезаданд ва аз телефон ба якдигар нишон дода, гоҳ афсӯс мехурданд, гоҳо механдиданд...

Ба хона омадам, ки меҳмон дорем: хушдоманам. Хурсанд шудам, ки бибии ҳаштодсолаи фарзандони ман баъд аз меҳмонӣ ба хонаи се фарзанди дигараш дар шаҳри Душанбе ба хонаи мо ҳам меҳмон шудааст.

Аз ҳолу аҳволи хушдоман пурсон шудам, аз духтару бачаҳояш, набераву абераҳояш... Дар суҳбати қариб дусоата бо бибии бачаҳо як чиз маро ҳайрон кард: фейсбук! Бале, худи худаш...

Смартфони дасти бибиро дида, аввал каме ба ҳайрат мондам. О, пиракӣ мардум бештар ҳамон телефонҳои маъмулиеро, ки танҳо хос барои суҳбат кардан аст, истифода мебурданд-ку? Вале ба ин навгонӣ, албатта, дар дил муросо кардам.

- Бачам, худат ба ман фейсбук кушода деҳ, ки ҳамсарат сарфаҳм нарафт. – гуфт хушдоман телефонашро ба ман дароз карда.

Маълум, ки то омадани ман ҳамроҳ бо духтараш кӯшиши саҳифакушоӣ карда, муваффақ нашудаанд.

- Хола, шумо фейсбука кушода саратона ба дард монда чи кор мекунед? Беҳтараш ба телефонатон барномаи вайбер дуруст кунем бо набераҳотон суҳбат кунед...

- О, ман вайбер дорам, бачам, ба ман фейсбук даркор!

- Барои чи ин қадар зарур шуда мондааст, фейсбук?

- Олуфтаи ҳамсояро медонӣ, ҳа? Бибии Комрону Фариштаро...

- Медонам...

- Ана, ҳаму гуфт, ки аз ин вайбер ҳам фейсбук зӯртар будааст. Одами ёша пиру пира ёш мекардааст...

Ростӣ баъди ин гапи хушдоманам даҳонам калон кушода монд.

- Масъала фақат ҳамин ҷавон намудан аст, хола? – пурсидам бо табассум.

Кампир ишорати маро фаҳмид ва гуфт, ки гап танҳо сари ин не. Фейсбук номаъқулиҳои зиёди дигар ҳам дорад, ки даромада дидан даркор...

Ҳанӯз масъалаи фейсбуки хушдоманро ҳал накарда будем, ки духтарчаи ҳафтсолаам ба навбат истод:

- Дада, барои ман ҳам якта фейсбук кушода диҳед...

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
28 29 30 31 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 1

Ноябр 2019 c.