Вазири тандурустӣ ва ҳифзи иҷтимоии аҳолии Ҷумҳурии Тоҷикистон аз норасоии мутахассисон дар муассисаҳои кишвар гуфт.
Ин нуктаро Ҷамолиддин Абдуллозода зимни нишасти матбуотӣ ба рӯзноманигорон иттилоъ дод.

Ӯ таъкид намуд, ки айни замон дар ҷумҳурӣ 2298 табиб ва 575 ҳамшираи тиббӣ, аз ҷумла дар вилояти Суғд - 579 табиб, 54 ҳамшираи тиббӣ, дар вилояти Хатлон - 788 табиб, дар шаҳру ноҳияҳои тобеи ҷумҳурӣ - 412 табиб, 219 ҳамшираи тиббӣ, дар шаҳри Душанбе - 49 табиб, 35 ҳамшираи тиббӣ, дар муассисаҳои хусусӣ - 149 табиб, 67 ҳамшираи тиббӣ ва дигар идораю вазоратҳо - 153 табиб ва 105 ҳамшираи тиббӣ намерасад.

Дар идома вазири тандурустӣ иброз дошт, ки дар маҷмуъ дар Тоҷикистон ихтисосе нест, ки мутахссиси он самт вуҷуд надошта бошад, танҳо дар бархе бахшҳо, барои мисол нарколог-психиатр кам ҳастанд.

Ҳамзамон, вазир гуфт, ки имрӯз шумораи донишҷӯёни муассисаҳои таҳсилоти олии касбӣ 20098 ва донишҷӯёни донишкадаҳои тиббӣ 61621 нафарро ташкил медиҳад, ки нисбат ба ҳамин давраи соли гузашта 2441 ва 1294 нафар зиёд аст.

“Бо афзудани шумораи донишҷӯён мушкилоти норасоии кадрӣ дар соҳаи тандурустӣ ҳалли худро хоҳад ёфт",-зикр намуд вазир..

Фараҳноз САФАРОВА, “ҶТ”