Дар шаш моҳи аввали соли ҷорӣ ба маблағи 53,52 млн. доллар ба ҷумҳурӣ дору ва молҳои тиббӣ ворид карда шудааст, ки ин нишондиҳанда нисбат ба ҳамин давраи соли гузашта 3,28 млн. доллар зиёд мебошад.

Дар ин бора Ҷамолиддин Абдуллозода, вазири тандурустӣ ва ҳифзи иҷтимоии аҳолии Ҷумҳурии Тоҷикистон 5 август зимни нишасти матбуотӣ иттилоъ дод.

Мувофиқи маълумоти пешниҳодкардаи номбурда дар шаш моҳи аввали соли ҷорӣ фаъолияти 234 муассисаи фармасевтӣ ва 158 муассисаи табобатию профилактикӣ санҷида шуда, аз онҳо 735 номгӯй дору ва молҳои тиббӣ, ба миқдори 4321 адад аз муомилот гирифта шудааст, ки нисбат ба ҳамин давраи соли гузашта 602 номгӯй ва 11696 адад кам мебошад.

- Дар ин муддат бо иштироки комиссияи махсус 82 041 кг дору, молҳои тиббӣ, маводҳои ороишию гигиенӣ ва ғизои кӯдаконаи муҳлати истифодабариашон гузашта, бе сертификати мутобиқат ва ба талаботҳо ҷавобгӯй набуда, бо роҳи сӯзонидан несту нобуд карда шудаанд, ки нисбати ҳамин давраи соли гузашта 7872 кг зиёд мебошад, - гуфт Ҷамолиддин Абдуллозода.