Вазорати корҳои дохилии кишвар бо нашри муроҷиатномае дар сомонаи худ аз шаҳрвандони кишвар хоҳиш менамояд, ки барои зудтар иваз намудани шиносномаҳо ва аз нав ба қайд гирифтани симкортҳои худ ба шуъбаҳои ВКД-и кишвар муроҷиат намоянд.

Тавре маркази матбуоти ВКД-и Ҷумҳурии Тоҷикистон таъкид кардааст, ба азнавбақайдгирии симкортҳо муҳлати кам мондааст.

Вазорат хабар медиҳад, ки мутобиқи қарори Ҳукумати Ҷумҳурии Тоҷикистон аз 30 апрели соли 2016, №207-7 “Дар бораи тартиб ва талаботи пайвастшавӣ ба шабакаи алоқаи барқӣ ва хизматрасониҳои вобаста ба он” муҳлати азнавбақайдгирии симкортҳои мобилӣ бо шиносномаи шаҳрванди Ҷумҳурии Тоҷикистон намунаи соли 2014 то 15-уми феврали соли 2023 муайян шудааст.

- Бинобар ин, аз ҳамаи шаҳрвандони Ҷумҳурии Тоҷикистон, ки симкортҳои мобилиашон бо шиносномаи намунаи соли 1996 ба қайд гирифта шудаанд, хоҳиш карда мешавад, ки таъҷилан барои иваз намудани шиносномаҳои худ ба хадамотҳои шиносномавию бақайдгирии шуъбаҳои ВКД дар шаҳру ноҳияҳои ҷумҳурӣ муроҷиат намоянд”,- омадааст дар хабар.

Вазорат рӯйхати ҳуҷҷатҳое, ки барои ивази шиносномаи шаҳрванди Тоҷикистон лозим мебошад, дар сомонаи расмии худ нашр кардааст.