Давоми шаш моҳи соли равон дар Вилояти Мухтори Кӯҳистони Бадахшон 15 ҳодисаи хусусияти техногенӣ рух дод, ки дар натиҷа 13 нафар шаҳрвандони Ҷумҳурии Тоҷикистон ҷони худро аз даст доданд, - иброз намуд, муовини сардори Раёсати Кумитаи ҳолатҳои фавқулода ва мудофиаи гражданӣ дар ВМКБ Сафарбек Аваз зимни нишасти матбуотӣ.

Аз ҷумла, дар пайи чор садамаи нақлиётӣ панҷ нафар, беэҳтиётӣ ду нафар, сӯиқасд ба ҷони худ як нафар ва дигар ҳодисаҳои нохуш панҷ нафар ба ҳалокат расиданд.

Дар ин давра дар вилоят 11 ҳодисаи сӯхтор сар зад, ки маблағи умумии хисорот 147 ҳазору 339 сомониро ташкил медиҳад.

Бо мақсади сари вақт гузаронидани корҳои пешгирикунанда, баланд бардоштани устувории ҷомеа аз офатҳои табиӣ аз тарафи афсарони шуъбаву бахшҳои раёсат дар ноҳияҳои Дарвоз, Ванҷ, Рӯшон, Роштқалъа, Ишкошим дар ҳамкории Агентии Оғохон оид ба макони зист машқҳои эвакуатсионӣ роҳандозӣ гашта, инчунин дар ин давра корҳои соҳилмустаҳакамкунӣ дар вилоят бомаром ба анҷом расонида шуданд.