Рӯзҳои истироҳат бо ҷалби зиёда аз 60 нафар ҷавонону варзишгарон ва масъулини соҳаи кор бо ҷавонон ва варзиши ВМКБ дар шаҳри Хоруғ ҳашари умумӣ гузаронида шуд.

Иқдоми мазкур бо ташаббуси Раёсати кор бо ҷавонон ва варзиши вилоят дар Боғи набототи Помир, гирду атрофи он ва маҳаллаи Усмон Холдорови шаҳр доир гардид.

Дар рафти корҳои ободонӣ роҳу пайроҳаҳои боғ, майдони варзишии назди он, атрофи Институти биологии Помир ба номи Худоёр Юсуфбеков ва дигар ҷойҳои маҳалла аз сангу хокрубаҳою алафҳои сари роҳ тоза карда шуд.

Сардори раёсат Сураҷ Чоршанбиев гуфт, ки ҳашарҳои оммавӣ ба ифтихори Истиқлолияти давлатии кишвар дар шаҳру навоҳии вилоят ҳанӯз ҳам ҷараён доранд.