23 июн бахшида ба Рӯзи Ваҳдати милӣ дар шаҳри Хоруғ мусобиқаи дави миллӣ баргузор гардид.

Дар мусобиқа табақаҳои гуногуни ҷомеа, аз он ҷумла роҳбарият ва кормандони сохтор Мақомоти иҷроияи ҳокимияти давлатии шаҳри Хоруғу ВМКБ, ниҳодҳои амниятию мақомоти ҳифзи ҳуқуқ, олимону зиёиён, аҳли илму адаб, наврасону ҷавонон, занон ва калонсолон иштирок карданд.

Чорабинӣ бо садо додани Суруди миллӣ дар назди майдони Исмоилӣ Сомонии шаҳри Хоруғ оғоз ёфта, иштирокчиёни мусобиқа то боғи Ғалабаи шаҳр сабқат карданд.

Раиси вилоят зимни суханронӣ дар маросими ифтитоҳи дав ҳозиринро ба фарорасии 27- умин солгарди Ваҳдати миллӣ самимона табрик намуда, иброз дошт, ки варзиши сабук ё худ дав - шоҳи варзиш эътироф гардида, беҳтарин ва зеботарин чорабинии варзишие мебошад, ки дар воқеъ тамоми аҳли ҷомеа, аз хурд то бузург, ҳама зери як шиор, - “миллати ҷисман солим ва руҳан солим” дар он фаъолона иштирок мекунанд.

Хотиррасон бояд кард, ки мақсади асосии баргузории дави миллӣ ташвиқи тарзи ҳаёти солим ва мустаҳкам намудани робитаи дӯстиву бародарӣ, таҳкими пояҳои ваҳдату истиқлолият, якпорчагию якмаромии миллат мебошад.