Дар асоси дастуру супоришҳои бевоситаи Пешвои миллат муҳтарам Эмомалӣ Раҳмон ва бо мақсади сазовор таҷлил намудани 30 – солагии Истиқлолияти давлатии Ҷумҳурии Тоҷикистон ҳоло дар шаҳру ноҳияҳои вилоят зиёда аз 613 иншооти муҳим сохта шуда, давоми соли равон 441 адади онҳо мавриди истифода қарор мегиранд.

Ба гуфтаи Айдармамад Гулмамадов, мудири шуъбаи меъморӣ ва шаҳрсозии мақомоти иҷроияи ҳокимияти давлатии ВМКБ инҳо асосан иншооти азими вилоят буда, бар замми ин, майдончаҳои хурди варзишӣ, меҳмонхонаву ҳаммом, кошонаҳои ҳусн, китобхонаву марказҳои савдо, муассисаҳои томактабиву таҳсилоти умумӣ, сохтмони роҳу пулҳои мошингузар ва дигар иншооти аҳамияти иҷтимоиву иқтисодидошта дар шаҳру ноҳияҳои вилоят сохта шуда истодаанд.

Ба иттилои манбаъ, феълан дар вилоят гӯшае нест, ки дар он корҳои ободониву созандагӣ авҷи тоза нагирифта бошанд. Ҳатто дар мавзеъҳои дурдасти ноҳияҳои вилоят чунин корҳо бомаром ҷараён дорад.