Ба истиқболи Рӯзи Парчами давлатии Ҷумҳурии Тоҷикистон дар шаҳри Хоруғ роҳпаймоии оммавӣ таҳти унвони “Парчам – рамзи шарафмандии миллат” доир гардид.

Роҳпаймоӣ аз назди варзишгоҳи марказӣ оғоз гардида, зиёда аз 5 ҳазор нафар сокинони вилоят, аз ҷумла собиқадорон, ҷавонону бонувон, кормандони идораву муассисаҳои вилоятию шаҳрӣ, устодону донишҷӯёни муассисаҳои олӣ, намояндагони ташкилотҳои ғайридавлатӣ, варзишгарону парчамбардорони миллат ва дигар қишрҳои ҷомеа бо парчамҳо ва шиору овезаҳои ватандӯстона то майдони парчам роҳ паймуданд.

Раиси ВМКБ дар маросими расмӣ кулли сокинони вилоят ва ҳамватанонро бо Рӯзи Парчами давлатӣ табрику муборакбод намуд.
Гуфта шуд, ки Парчам рамзи номус, виҷдон, садоқат ва омодагии ҳар як ватандор барои ҳимоя аз ҳастии маънавию ҷисмонии миллат ба шумор рафта, ҳазорҳо фарзанди сарсупурдаи миллат зери Парчами давлатӣ корнамоиҳои бузург анҷом додаанд, ки дар шоҳкитоби таърихи миллат абадан дарҷ гардидаанд. Маҳз ба ҳамин хотир, Роҳбари давлат муҳтарам Эмомалӣ Раҳмон бо бардоштани Парчами давлатдории навини тоҷикон руҳияи миллатро баланд, ҳувияти миллиро эҳё ва ливои номуси онро боло афрохтанд.

Дар фарҷом барномаи рангини консертӣ аз ҷониби аҳли санъати вилоят манзури ҳозирин гардонида шуд.

Садоншо ҶАНОБИЛШОЕВ, “ҶТ”