Дар маркази Вилояти Мухтори Кӯҳистони Бадахшон, шаҳри Хоруғ ба муносибати Рӯзи даъватшаванда чорабинии тантанавӣ баргузор гардид.

Пеш аз оғози чорабинӣ роҳбарияти вилоят, шаҳру ноҳияҳо, наваскарону волидон, наздикони даъватшудагон ва тамоми қишрҳои ҷомеа аз назди майдони Исмоили Сомонӣ то Боғи фарҳангӣ – фароғатии шаҳр бо муқаддасоти миллӣ ва шиорҳои ватандӯстона роҳ паймуданд.

Дар боғи мазкур раиси ВМКБ Мирзонабот Алишер Худобердӣ зимни баромади худ таъкид кард, соли панҷум аст, ки ин анъанаи нек, яъне дар як рӯз таъмин гаштани нақшаи даъват дар вилоят боиси ифтихор ва сарбаландии ҳамаи сокинон буда, ин иқдом аз ҷониби Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи мамлакат, генерали Артиш муҳтарам Эмомалӣ Раҳмон чун поягузори неруи пуриқтидори мудофиавии мамлакат зимни мулоқоти охир бо фаъолони вилоят ҳам баҳои сазовор гирифт.

- Ин баҳо ва боварии халқу роҳбарияти олии кишвар моро руҳбаланду водор бар он менамояд, ки минбаъд низ фаъолияти худро дар самти омодагию дифоъ аз Ватан - модар ва таъмини амнияту бехатарии он боз ҳам тақвият бахшида, баҳри таҳкими иқтидори мудофиавии давлати соҳибистиқлоли хеш тадбирҳои муассир андешем, - қайд кард раиси ВМКБ.

Гуфта шуд, ки вазъияти пурпечутоби ҷаҳону минтақа, ки вақтҳои охир муташанниҷ шудааст, аз ҳамаи мо тақозо менамояд, ки ба ҳар вазъу ҳолати тағйирёбандаи замон омода бошем. Барои ин, шуруъ аз муассисаҳои томактабӣ ва муассисаҳои таълимии миёнаву олӣ то дигар омӯзишгоҳҳои марбута дар тарбияи ватандӯстӣ, ташаккул, таҳкими ҳувияти миллӣ, таълими донишҳои ҳарбӣ ва обутоби ҷисмонии насли наврасу ҷавон таваҷҷуҳи бештар зоҳир намоем.

Дар охир даъватшудагон бо нону намак ва рақсу суруд ба хизмати Модар - Ватан гусел карда шуданд.