Имрӯз дар пешорӯи Рӯзи Президенти Ҷумҳурии Тоҷикистон бо ибтикори мақомоти иҷроияи ҳокимияти давлатии Вилояти Мухтори Кӯҳистони Бадахшон тамошои дастаҷамъонаи филми “ПЕШВО” – и МД рӯзномаи “Ҷавонони Тоҷикистон” дар идораву муассисаҳо ба роҳ монда шуд.

Филми мазкур бар асоси воқеаҳои даҳшатбори солҳои 90-уми асри гузашта, ки бар сари миллати тоҷик омада буд, аз ҷониби МД рӯзномаи “Ҷавонони Тоҷикистон” таҳия гардидааст.

Муҳтавои асосии ин филм ба рӯзгор, ҷоннисорӣ, ҷасорату мардонагӣ ва аз худгузаштанҳои Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон бахшида шуда, дар он вазъи иқтисодиву сиёсии Тоҷикистон баъди соҳибистиқлолии кишвар бо инъикоси ҳаёти реалии мардуми тоҷик бозтоби хешро ёфтааст.

Як тан аз ҷавонони фаъол Кишвар Амиршоев баъди тамошои филм фикру ақидаашро чунин баён кард: “Сарвари давлат аз рўзи нахустини ба вазифаи Раиси Шурои Олӣ интихоб шудан, дар назди худ мақсад гузоштанд, ки миллати тоҷикро аз парешонӣ наҷот медиҳад ва дар Иҷлосияи 16-уми Шурои Олӣ дар нахустин муроҷиати худ ба халқи Тоҷикистон гуфта буданд: “Ман барои шумо сулҳ меорам. Агар лозим шавад, ҷонамро низ фидо мекунам”. “То даме ки охирин гуреза ба Тоҷикистон барнагардад, ман худро ором ҳис намекунам”.

Дар филм лаҳзаҳои ҳузновари ҷанги бародаркуш бо забони шоҳидони воқеӣ оварда шудааст, ки хеле риққатовар ва таъсирбахш аст.
- Азияту заҳмате, ки бар сари мардуми тоҷик омад, миллатро ба вартаи ҷанги шаҳрвандӣ кашид, иқтисоди кишварро фалаҷ, ҳазорон нафар бегуноҳро кушта, бесарпаноҳу бесаробон, муҳоҷир ва сарсону парешон намуд. Аммо, дар ин айём фарзонафарзанди миллати тоҷик Эмомалӣ Раҳмон зимоми роҳбариро ба дӯши худ гирифта, Тоҷикистонро аз парешонӣ ва мардуми тоҷикро аз яъсу ноумедӣ наҷот бахшид. Шахсияти Пешвои миллат ҳамчун наҷотбахши миллати тоҷик, қосиди сулҳу ваҳдат дар таърих бо хати заррин сабт гардидааст, - гуфт директори МД Коллеҷи тиббии шаҳри Хоруғ Т. Имомёрбекова.

- Дар ҳақиқат, баъди тамошои филми “ПЕШВО” дар зеҳни ҳар бинанда ғурури ватанпарастиву ватандорӣ, муҳаббату садоқат ба Ватан ва арзишҳои миллӣ бедор мегардад. Бешак, барои насли ҷавон, ки шоҳиди воқеаҳои асри гузашта набуд, филми мазкур ҳамчун дарси ибрат аз гузашта ва интихоби дурусти ҳаёт дар оянда мегардад, - иброз кард мудири бахши муроҷиати шаҳрвандони дастгоҳи раиси ВМКБ Бегим Саидбаҳроншоева.

Ҳамин тариқ, дар доираи ин иқдом филми “ПЕШВО” дар дастгоҳи раиси вилоят, Муассисаи давлатии Коллеҷи тиббии шаҳри Хоруғ, Муассисаи таълимии давлатии “Мактаби Президентӣ барои кӯдакони болаёқат дар шаҳри Хоруғи ВМКБ”, Донишгоҳи давлатии Хоруғ ба номи М. Назаршоев, Литсей барои кӯдакони болаёқат дар шаҳри Хоруғ ва дигар идораву муассисаҳо ба таври дастҷамъона намоиш дода шуд.

Садоншо ҶАНОБИЛШОЕВ,
“ҶТ”