Мукшкилии асосӣ дар самти танзими ҳаракати нақлиёт ин тамбашавӣ дар маркази вилоят, шаҳри Хоруғ буд, ки соли гузашта қариб ҳалли пурраи худро ёфта буд, - гуфт дар нишасти хабарӣ муовини сардори Раёсати Хадамоти давлатии назорат ва танзим дар соҳаи нақлиёти ВМКБ Нуриддин Назархудоев.

Дар ин давра барои автомобилҳои мусофиркашоние, ки аз самти маркази ҷумҳурӣ ва ноҳияҳои вилоят ба Хоруғ ҳаракат намуданд, терминалҳои наздишаҳрӣ кушода шуд.

Азҷумла, дар мавзеи Бидурди ноҳияи Шуғнон аз тарафи соҳибкорони ватанӣ терминали замонавӣ бо ҳамаи шароитҳои лозимӣ ифтитоҳ ёфта, ҳоло ҳашт нақлиёти мусофирбари замонавӣ дар хатсайри Бидурд - Хоруғ фаъолият доранд.

Гарчанде дар самти пардохти нархи роҳкиро аз тарафи роҳбарияти ин терминал ба нафақахӯрону донишҷӯён, мактаббачагону шахсони ниёзманд имтиёзҳои гуногун пешбинӣ шудаасту ҳамарӯза мусофирони зиёд аз он бархӯрдоранд, вале шурӯъ аз соли 2014 дотатсияи давлатӣ аз маркази ҷумҳурӣ барои ҷамъиятҳои автомобилии мусофиркашонии Хоруғ ҷудо намешавад ва маблағи имтёзҳоро дар вилоят ягон идора пардохт карда наметавонад.

Инчунин қайд шуд, ки ғайр аз терминали Бидурд қариб ҳамаи терминалҳои нақлиётии шаҳру ноҳияҳои вилоят ба талаботи замон ҷавобгӯ набуда, давоми сол аз тарафи прокуратураҳои шаҳру ноҳияҳо терминалҳо ба маблағи аз 5 000 то 10 000 сомонӣ ҷарима шуданд.

Терминали асосие, ки дар назди Бозори марказӣ буду солҳо ба мардум хизмат мекард, феълан ҳамаи ҷойҳои он аз худ карда шуда, дар дохилу атрофи он мағозаву дӯконҳои гуногун фаъолият доранд ва ин омил мушкилии назорату танзими ҳаракати нақлиётро дар вилоят дучанд менамояд, - афзуд Н. Назархудоев