Водии Вахш дар муқоиса бо дигар минтақаҳои кишвар иқлими нисбатан гарм дорад ва ҳамасола дар фасли тобистону тирамоҳ талаботи сокинон ба оббозӣ зиёд мегардад, вале дар масъалаи бунёди ҳавзҳои махсуси шиноварӣ таваҷҷуҳ камтар зоҳир мегардад.

Таи солҳои охир бо таваҷҷуҳи Ҳукумати мамлакат ва ҳавасмандии сокинону соҳибкорон дар ҳама шаҳру навоҳии кишвар корҳои зиёди созандагиву бунёдкорӣ амалӣ карда шуда, иншооти гуногуни маишиву хизматрасонӣ мавриди баҳрабардорӣ қарор дода мешаванд.

Вале мутаассифона, дар самти сохтмону бунёди ҳавзҳои шиноварӣ дар шаҳру ноҳияҳои вилояти Хатлон таваҷҷуҳ камтар зоҳир мегардад, ки ин ҳолат дар давраи гармиҳои сол ҳангоми зиёд машғул гардидани ҷавонону наврасон дар лаби каналу дарёҳо бараъло мушоҳида мегардад.

Ҳамасола дар фасли тобистон вобаста ба баланд шудани ҳарорати ҳаво дар ҷануби кишвар, бахусус минтақаи Бохтар талаботи сокинон нисбат ба оббозӣ зиёд мегардад.

Дар ин шабу рӯз мувофиқи иттилои мутахассисони соҳаи обуҳавошиносӣ ҳарорати ҳаво дар кишвар то 40 дараҷаро ташкил менамояд, ки дар лаби ҷӯю канал ва рӯду дарёҳо шиноварии сокинон, хусусан ҷавонону наврасон баштар ба назар мерасад, ки ба гуфтаи мутахассисон на дар ҳама ҳолат қоидаҳои шиноварӣ риоя мегардад.

Тибқи маълумоти Раёсати Кумитаи ҳолатҳои фавқулода ва мудофиаи гражданӣ дар вилояти Хатлон соли 2019, 23 нафар сокинони вилоят, ки асосан ҷавонону наврасон мебошанд, ҳангоми шиноварӣ дар каналу дарёҳо ғарқ шуда ба ҳалокат расидаанд.

Давоми соли ҷорӣ бошад, то имрӯз аллакай 6 ҳолати ғарқшавии сокинон ба қайд гирифта шудааст, ки ҷасадҳои фавтидагон аз ҷониби кормандони Раёсати Кумитаи ҳолатҳои фавқулода ва мудофиаи гражданӣ дар вилояти Хатлон аз об бароварда шуда ба наздикону пайвандонашон супорида шудаанд.

Тавре мутахассисони самти шиноварӣ ва наҷотдиҳандагон иброз менамоянд, яке аз мушкилоти асосӣ дар масъалаи таъмини оббозии сокинон, ин кам будани ҳавзҳои махсуси шиноварӣ бошад, аз ҷониби дигар, аксарияти ҳолатҳои ғарқшавии сокинон, ин надонистану риоя накардани қоидаҳои шиноварӣ дар ҷӯю каналҳо маҳсуб меёбад, ки ин ҳам ба набудани ҷой барои машқи оббозӣ мебошад.

Ба иттилои масъулини соҳа, дар маркази вилоят - шаҳри Бохтар фаъолияти ҳавзҳои шиноварӣ ба талаботи сокинон ҷавобгӯ мебошад, вале мутахассисону сокинон иброз менамоянд, ки ҳамагӣ 3 ҳавзи шиноварие, ки ду адади он ҳанӯз даҳсолаҳо қабл сохта шудаанд, айни ҳол танҳо яктои он фаъолият менамояду халос, ки ин талаботи сокинонро қонеъ карда наметавонад.

Ба андешаи табибон шиноварӣ яке аз намудхои маъмули варзиш маҳсуб ёфта, барои рушди бадан ва солимии ҳар як нафар манфиатовар мебошад, махсусан дар мавсими гармӣ.

Аз тарафи дигар, ба оббозӣ машғул гардидани сокинон дар лаби ҷӯю дарёҳо масъулини мақомоти наҷотдиҳиро аз он нигарон кардааст, ки сол аз сол ғарқшавии сокинон ҳангоми шиноварӣ дар вилоят меафзояд.

Ҳамчунин аксари ҷӯю дарёҳои обгузари минтақаи Бохтар баробари шодоб гардонидани заминҳои кишоварзӣ, инчунин воситаи асосии таъмини сокинон бо оби нӯшокӣ маҳсуб мебошад. Аз ин хотир табибон иброз медоранд, ки машғул гардидани ҷавонону наврасон ва дигар қишри ҷомеъа ба шиновариву бароварда кардани эҳтиёҷоту талаботи организми хеш дар чунин обҳо, боиси ифлос гардидани обу пайдо шудани ҳар гуна бемориҳои сироятӣ мегардад.

Бино ба иттилои масъулини Раёсати кор бо ҷавонон ва варзиши вилояти Хатлон айни замон дар шаҳру навоҳии вилоят фаъолияти 33 адад ҳавзҳои шиноварӣ ба қайд гирифта шудааст, ки танҳо дар гурӯҳи шаҳру ноҳияҳои минтақаи Бохтар, ки аз қисматҳои иқлимаш гарми кишвар маҳсуб мегардад, ҳамагӣ 3 адад чунин маконҳои шиноварӣ фаъолият менамояд, 2 ҳавзи оббозӣ дар шаҳри Бохтар ва як маҷмааи шиноварӣ дар ноҳияи Кӯшониён бо номи “Аквапарк”.

Акнун дар доираи нақшачорабиниҳои ободониву созандагӣ бахшида ба истиқболи ҷашни 30-солагии Истиқлолияти давлатии кишвар дар шаҳру навоҳии вилоят бунёди 13 адад ҳавзҳои гуногуни шиноварӣ ба нақша гирфита шудааст, ки аз ин шумора то имрӯз ду ададаш мавриди истифодабарӣ қорор гирифтаанд.

Дар ҳамин доира ба иттилои масъулин, тибқи нақшаи генералии шаҳри Бохтар баробари бунёди дигар иншооти маишию хизматрасонӣ ҳамчунин аквапарк дар масоҳати 2 гектар, маҷмааи варзишӣ дар майдони 36 гектар ва якчанд адад ҳавзҳои шиноварии ҷавобгӯ ба талаботи имрӯзаи сокинон сохта мавриди истифода қарор дода мешавад.



Таваралӣ СОҲИБНАЗАРОВ,

“ҶТ”