Масъулини вилояти Хатлон бо дастпарварони мактабҳои варзишӣ вохурӣ намуда, аз ҷараёни машғулиятҳои тамринӣ дидан карданд. Дар ин бора Раёсати кор бо ҷавонон ва варзиши вилоят иттилоъ медиҳад.

Бино ба иттилои манбаъ, Рамазон Насриддинзода, сардори Раёсати кор бо ҷавонон ва варзиши вилояти Хатлон ҷиҳати назорати доимии толорҳои варзишӣ ва дар ҳолати хуби санитарӣ нигоҳ доштани онҳо бо дастпарварони мактабҳои варзишӣ вохӯрӣ доир намуда, бо ҷараёни машғулиятҳои тамринӣ аз наздик шинос шуд.

Зимни вохӯрӣ таъкид гардид, ки тарбияи ҷисмонӣ ва варзиш барои инсон аҳамияти муҳим дошта, яке аз омилҳои асосии тандурустӣ ва ташаккули шахсияти ҷисман ва руҳан солим ба шумор меравад.

- Аз ин рӯ, шумо-варзишгарон метавонед бо истифода аз шароиту имкониятҳои фароҳамовардаи давлату Ҳукумат ба таври зарурӣ тамрин намуда, нуфузи кишварамонро дар сатҳи байналмилалӣ боз ҳам баланд бардоред, - иброз дошт Рамазон Насриддинзода.