Вобаста ба фаҳмондану татбиқи нуқтаҳои Паёми имсолаи Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон ба Маҷлиси Олӣ дар ҷамоати деҳоти Маҳмадулло Абдуллоеви ноҳияи Ванҷ мулоқоти намояндаи Ҳукумати Ҷумҳурии Тоҷикистон, раиси Кумитаи рушди сайёҳии назди Ҳукумати Ҷумҳурии Тоҷикистон Нӯъмон Абдуғаффорзода ва роҳбари дастгоҳи раиси ноҳия Масрур Ғайратов бо сокинони ноҳия сурат гирифт.

Зикр шуд, ки ҷиҳати рақобатпазир гардонидани соҳаи сайёҳӣ дар бозори ҷаҳонӣ, омода намудани мутахассисони забондон, пурра бархӯрдор гаштан аз фарҳангу таърих, технологияҳои муосир дар паёми имсола махсус таъкид гардида, ба хотири рушди бемайлони соҳаву муаррифии кишвар тамоми сохторҳои давлатӣ, ҷомеаи шаҳрвандӣ, соҳибкорон ва дигар идораву созмонҳои ғайридавлатӣ бояд аҳлона фаъолият намоянд.

- Маҳз ташаббуси бевоситаи Пешвои миллат аст, ки дар дар доираи "Солҳои рушди деҳот, сайёҳӣ ва ҳунарҳои мардумӣ" бо ҳадафи ҷалби бештари сайёҳон ба Тоҷикистон раводиди навъи сайёҳии бисёркарата ба муҳлати то 60 рӯз ба шаҳрвандони хориҷӣ ва баҳри рафтуомади ҳамватанони бурунмарзии зодагони Тоҷикистон бошад, раводиди бисёркаратаи сесола дода мешавад – иброз дошт, Н. Абдуғаффорзода.

Дар вохӯрӣ инчунин оид ба масоили баланд бардоштани фаъолнокии иқтисодии аҳолӣ, азхудкунии донишҳои замонавӣ, ташвиқи наврасону ҷавонон ба мутолиаи китобҳои бадеиву илмӣ, омӯзиши илмҳои дақиқ, дастгирии соҳибкории хурду миёна ва дигар нукутаҳои дар паём зикргардида сухан рафт.