Ба Ҷумҳурии Тоҷикистон дар зарфи 9 моҳи соли равон вуруди шаҳрвандони хориҷӣ нисбати ҳамин давраи соли 2021 2,5 баробар афзудааст. Дар ин бора Агентии омори назди Президенти Ҷумҳурии Тоҷикистон иттилоъ медиҳад.

Бино ба иттилои манбаъ, давоми моҳҳои январ-сентябри соли равон, 870 ҳазор шаҳрвандони хориҷӣ ба Тоҷикистон омадаанд ва ин нишондиҳанда дар ҳамин давраи соли 2021 ба 344 ҳазор нафар баробар буд.

Вуруди нисбатан бештари хориҷён ба ҷумҳурӣ дар семоҳаи сеюми ҳамин сол ба қайд гирифта шудааст, ки шумораи он зиёда аз 400 ҳазор нафарро ташкил медиҳад. Дар ду семоҳаи аввали сол (6 моҳ) 470 ҳазор нафар аз Тоҷикистон боздид намудаанд.

Аз ҳама бештар вуруди шаҳрвандони Русия афзудааст. Дар 2 семоҳаи аввал - 112 ҳазор ва дар семоҳаи сеюми ҳамин сол - 113 ҳазор нафар шаҳрвандони ин кишвар ба Тоҷикистон сафар намудаанд.

Вуруди шаҳрвандони кишварҳои дигар ба Тоҷикистон нисбатан баробар ва якхела сурат гирифтааст.

Ба ин тариқ, аз рӯи натиҷаҳои семоҳаи сеюм вуруди шаҳрвандони Ӯзбекистон ба ҷумҳурӣ аз 320 ҳазор нафар дар 2 семоҳаи аввал то ба 575 ҳазор нафар, Қазоқистон аз 9,7 ҳазор то ба 18 ҳазор, Туркия - аз 2,7 ҳазор то 5,2 ҳазор, Чин - аз 2 ҳазор то 3,8 ҳазор, Қирғизистон - аз 1,9 ҳазор то 3,5 ҳазор, Эрон - аз 1,8 ҳазор то 3,2 ҳазор ва Афғонистон - аз 1,5 ҳазор то 2,5 ҳазор нафар афзудааст.