Бахшида ба Рӯзи забони давлатӣ дар Кумитаи забон ва истилоҳоти назди ҳукумати ҷумҳурӣ конференсияи илмию амалии ҷумҳуриявӣ таҳти унвони “Истиқлолият ва сиёсати давлатӣ дар бораи забон” баргузор гардид.

Гавҳар Шарофзода, раиси Кумитаи забон ва истилоҳот, иштирокчиёнро бо Рӯзи забони давлатӣ муборакбод намуда, иброз дошт, ки забони давлатӣ яке аз арзишҳои бузурги миллӣ ва пояҳои давлатдорӣ буда, таҷассумгари таърихи куҳан мебошад. Дар солҳои истиқлолият доираи истифодаи забони давлатӣ хеле вусъат ёфта, асарҳои зиёди илмию адабӣ ва сиёсиву публитсистӣ эҷод шуданд. Таърихи давлатдории ориёӣ шаҳодат медиҳад, ки давлатҳои бостонии мо ҳамеша саъю кӯшиш мекарданд, ки барои устувор сохтани пояи давлатдорӣ, ба вуҷуд овардану мустаҳкам сохтани давлатдории миллӣ ва ваҳдату ягонагӣ аз унсурҳои забонӣ истифода бурда, барои рушду инкишоф ва густариши забони модарӣ тадбирҳои мушаххас андешанд.

Номбурда дар идомаи суханронияш таъкид сохт, ки забони модарии ҳар миллат сарчашма ва манбаи бақои он буда, асоси илҳом ва меҳвари ҷунбишҳои ҳунарию фарҳангӣ ва илмии равшангарони он мебошад. Аз ин рӯ, бояд зикр намуд, ки Сомониён барои пойдории суннатҳои миллӣ ва ободии кишвар, бахусус барои боло бурдани мақому мартабаи давлат ва забону фарҳанги хеш аз ҳамаи имкониятҳо истифода карда, донишмандону адибонро ҷамъ оварда, осори арзишманде таълиф намуданд, ки дар сарчашмаҳои таърихӣ айёми тиллоии давлати тоҷикон шинохта шудааст. Мо бояд ба забони миллии худ арҷ гузорем. Зеро он воситаи муҳиму муқтадири сарҷамъ намудани миллат, таъмини якпорчагии сарзамини кишвар дар ҳамаи давру замон мебошад.



Дар конференсия зиёда аз 10 маърӯзаи илмӣ аз тарафи мутахассисони бахшҳои гуногуни забоншиносӣ ва дигар соҳаҳо шунида шуд. Аз ҷумла, Назрӣ Офаридаев, профессори Донишгоҳи давлатии Хоруғ дар мавзӯи “Забони давлатӣ ва билингвизм”, Мирзо Ҳасан Султон, доктори илмҳои филологӣ дар мавзӯи “Забон – омили ташаккул ва бақои миллат”, Шаҳбоз Кабиров, профессори Донишгоҳи миллии Тоҷикистон дар мавзӯи “Нақши истиқлолият дар вусъатбахшии маънои вожаҳо ва ҳамнишинии онҳо” ва дигар иштирокчиён доир ба нақши забони давлатӣ дар таҳкими давлатдорӣ маърӯза намуданд.

Зикр шуд, ки забони тоҷикӣ ҷавҳари миллати моро ташкил дода, тамоми мардуми тоҷикзабони кишварҳои ҳамсояи моро бо ҳам мепайвандад. Имрӯз забони тоҷикӣ дар як қатор давлатҳои Аврупову Осиё, ба монанди Фаронса, Канада, Ҷумҳурии Чех, Чин, Ҳиндустон ва Русия омӯзонида мешавад ва дар ин кишварҳо нашрияҳо бо забони тоҷикӣ ба табъ мерасанд.

Бо қаноатмандӣ гуфта шуд, ки Ҳукумати ҷумҳурӣ барои рушд ва вусъати бештар пайдо намудани доираи нуфузи забони давлатӣ тадбирҳои зиёдеро амалӣ менамояд. Таҷлили ҳарсолаи Рӯзи забони давлатӣ далели равшани сиёсати давлат дар самти забони давлатӣ буда, ин нуқтаро бори дигар ба таври равшан собит месозад.

Дар поёни чорабинӣ, пас аз баррасии маърӯзаҳо ва пешниҳодот баҳри рафъи мушкилоти забон дар самти татбиқи он ва чораандешиҳо дар роҳи рушду густариши забони давлатӣ тавсиянома қабул гардида, бо дарназардошти дурнамои таҳкиму танзими забони давлатӣ дар кишвар ва берун аз он, дар соҳаҳои гуногуни иҷтимоӣ, иқтисодӣ ва илмию техникӣ баҳри рушду густариши забони тоҷикӣ дар муносибатҳои байналмилалӣ, омӯзиши сарчашмаҳои таърихии забон ва дигар ҳамкориҳо дар ин самт баргузории силсилаи анҷуману семинарҳо ба нақша гирифта шуд.