Эҳтимол меравад, ки Масҷиди калонтарини Тоҷикистон дар нимаи аввали соли равон ифтитоҳ шавад.

Сулаймон Давлатзода, раиси Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон 3-юми феврал зимни нишасти хабарӣ гуфт, ки дар семоҳаи дуввуми соли равон сафари ҳайати Қатар ба Тоҷикистон дар назар аст ва шояд дар ҷараёни он кушодашавии ин масҷид сурат гирад.

Номбурда ҳамзамон гуфт, масҷиди калонтарин аз рӯи лоиҳаи дуҷониба бунёд шуда, ба ин хотир бояд он бо ҳузури намояндагони ду кишвар боз шавад.

Масҷиди калонтарин дар Ҷумҳурии Тоҷикистон дар майдони 12 гектар замин ҷойгир буда, аз чаҳор манораи баландиашон 65-метрӣ, гунбази 47-метрӣ, толори бузург, толорҳои хурди намозгузорӣ, китобхона ва нишеману утоқҳои сершумор барои ҷаласаҳо иборат аст.

Сохтмони масҷидро соли 2009, дар рӯзҳои таҷлил аз 1310-солагии Имоми Аъзам, пешвои мазҳаби ҳанафӣ оғоз карда буданд.