Бо шарофати сулҳу ваҳдати миллӣ иқдом намудан дар роҳи барпо намудани давлати демократӣ, дунявӣ ва ҳуқуқбунёд Ҷумҳурии Тоҷикистон кӯшишҳои худро ҷиҳати ҳифзи ҳуқуқу озодиҳои инсон тавассути мустаҳкам кардани заминаи қонунгузорӣ ва татбиқи сиёсат дар самти масъалаҳои занон ва ҷавонон мунтазам тақвият мебахшад. Бо дарки муҳимияти дастгирии қувваи ин ду қишри ҷомеа ҳамчун қувваи асосӣ ҷиҳати амалӣ намудани сиёсати иҷтимоӣ тавассути истифодаи нерӯи занон ва ҷавонон дар ташаккул, пешрафти давлат ҳифзи арзишҳои фарҳанги миллӣ ва ниҳоди давлатдорӣ яке аз самтҳои афзалиятноки давлату Ҳукумат маҳсуб меёбад. Зеро таърих исбот намудааст, ки субот ва пешрафти давлат аз дастгирии ин ду қишри ҷомеа вобастагии зиёд дорад. Вобаста ба ин, дар риштаи рушди қонунгузорӣ оид ба ҳуқуқҳо ва озодиҳои занон ва ҷавонон дараҷа ва миқёси татбиқи онҳо дар ҳаёти имрӯза таҷассуми худро ёфтааст. Яъне, барои дастгирии ин табақаи ҷомеа дар сатҳи қонунгузории амалкунанда дар баробари қабули қонунҳо, қабули барномаҳои рушди иҷтимоии онҳо ҷиҳати таъмини иштироки васеъ дар ҳаёти ҷамъиятиву идоракунии давлатӣ қабул гардида, самти фаъолияти занон ва ҷавонон дар шароити муносибатҳои нави сиёсиву иҷтимоӣ дар мамлакат муайян гардидааст.

Зиёда аз ин, ҷиҳати дастгирӣ бо таваҷҷуҳи хоса Роҳбари Олии мамлакат, Пешвои миллат қайд менамоянд: “Нақш ва мақому манзалати зан дар ҷомеаи мо имрӯз бениҳоят муҳим мебошад. Бе иштироки фаъолонаи занон, бидуни фикру ақида ва пешниҳодҳои онҳо ҳаллу фасли мушкилоти иҷтимоӣ-сиёсӣ ғайри имкон мебошад”. Дар ин бобат Фармони Президенти Ҷумҳурии Тоҷикистон “Дар бораи баланд бардоштани мақоми зан дар ҷомеа” аз 3 декабри соли 1999 ба тасвиб расид, ки дар ҳаёти занон ва ҷавондухтарон саҳифаи тоза боз намуд. Дар заминаи ин фармони тақдирсоз боз як қатор санадҳои меъёрии ҳуқуқӣ, аз қабили “Барномаи давлатии “Самтҳои асосии сиёсати давлатӣ оид ба таъмини ҳуқуқу имкониятҳои баробари мардон ва занон дар Ҷумҳурии Тоҷикистон барои солҳои 2001-2010”, Қарори Ҳукумати Ҷумҳурии Тоҷикистон аз 2001 “Дар бораи ба низом даровардани қабули духтарони Ҷумҳурии Тоҷикистон мувофиқи квотаи президентӣ барои солҳои 2001-2005”, “Барномаи давлатии тарбия, интихоб ва ҷобаҷогузории кадрҳои роҳбарикунандаи Ҷумҳурии Тоҷикистон аз ҳисоби занону духтарони лаёқатманд барои солҳои 2007-2016” “Стратегияи миллии фаъолгардонии нақши занон дар Ҷумҳурии Тоҷикистон барои солҳои 2011-2020”, “Барномаи давлатии пешгирии зӯроварӣ дар оила дар Ҷумҳурии Тоҷикистон барои солҳои 2014-2023”, “Барномаи давлатии тарбия, интихоб ва ҷобаҷогузории кадрҳои роҳбарикунандаи Ҷумҳурии Тоҷикистон аз ҳисоби занону духтарони лаёқатманд барои солҳои 2017-2020” қабул гардиданд, ки амалӣ гаштани ин барномаҳо дар ҷомеаи мо ҳамчун омили муҳими сифати ҳиссагузории занон дар рушди устувори ҷомеа аз аҳамияти хоса ва манзалати олии ҳуқуқи онҳо шаҳодат медиҳад.

Вобаста ба дастгирии ҷавонон 23 майи соли 1997 мулоқоти бо ҷавонон доштаи Пешвои миллат шаҳодат аз боварӣ ба нерӯи созандаи ҷавонон, инчунин, ҷиҳати дастгирии ҷавонони соҳибистеъдод таъсиси Стипендияҳои президентӣ ва номӣ, Квотаи президентӣ, Стипендияи байналмилалии президентӣ – “Дурахшандагон”, Грантҳои Ҳукумати Ҷумҳурии Тоҷикистон дар самти тарбияи ватанпарастии ҷавонон, Ҷоизаи ба номи И.Сомонӣ барои олимони ҷавон, Ҷоизаи Президенти Тоҷикистон барои варзишгарони мамлакат, таъсиси Шӯрои миллии кор бо ҷавонон дар назди Президенти Ҷумҳурии Тоҷикистон, ки ба хотири таҳкими робита миёни Президент ва ҷавонони мамлакат роҳандозӣ гардид, иқдомоти муҳими Пешвои миллат мебошанд, ки дар сатҳи байналмилалӣ бесобиқа аст.

Дар баробари ин, эълон гардидани соли 2017 ҳамчун “Соли ҷавонон” аз ҷониби Пешвои миллат, муҳтарам Эмомалӣ Раҳмон имкон фароҳам овард, ки шоҳиди чорабиниҳои имсолаи ҷавонон ва шарики нишоту муваффақиятҳои онҳо гардем. Ин иқдом барои ҷавонон дар ҷодаи амалигардонии сиёсати иҷтимоии мамлакат дар риштаҳои гуногуни соҳаҳои ҳаёти кишвар шавқу ғайрати дубора мебахшад. Дар ин росто мисол овардани суханҳои Пешвои миллат хеле бамаврид хоҳад буд: “Имрӯз ҷомеаи кишвар ба қудрат ва тавоноии ҷавонони тоҷик дар таҳаввулоти иқтисодиву иҷтимоӣ ва умури давлатдорӣ сахт эътимод дорад”.

Дар ҳақиқат, занон ва ҷавонон ҳамчун қувваи бузург дар маркази ҳар гуна тағйироту таҳаввулот ва падидаҳои ҷамъиятӣ қарор дошта, дар дигаргуниҳои ҷомеа нақши хеле муҳим доранд. Таърихи инсоният аз асноде, ки занон нерӯи созанда ва ҷавонон нерӯи бузург ҳастанд, саршор аст. Имрӯзҳо занон ва ҷавонон бо дарки амиқи дастгириҳои давлату Ҳукумат дар амалӣ гаштани сиёсати иҷтимоии давлат бо қаноатмандӣ, азму иродаи қавӣ ва завқи баланд дар тамоми соҳаҳои ҳаёти мамлакат кору фаъолият намуда истодаанд, ки ин аз пешрафти воқеии ҷомеа, роҳи рушду субот ва ояндаи миллат дарак медиҳад. Зеро дар ин раванд дарки таҳаввулот ва равандҳои ҷаҳони муосир ва дуруст дарку таҳлил намудани онҳо аз ҷониби занон ва ҷавонон дар пешбурди сиёсати иҷтимоии давлат ва нуфузи он нақши муҳим дорад. Чунки ҳар тағйиру таҳаввуле, ки дар ҷаҳони дирӯзу имрӯз ба вуқуъ мепайвандад, бархоста аз нерӯи занон ва ҷавонон сарчашма мегирад.

Дар ин раванд воситаи муҳими фаъолгардонии занон ва ҷавонон дар сатҳи хуб амалӣ намудани корҳои тарғиботӣ ва ташвиқотӣ ҷиҳати баланд бардоштани маърифати сиёсиву ҳуқуқӣ, баргузории чорабиниҳои гуногун, ки натанҳо аҳамияти баланди фарҳангӣ, балки аҳамияти баланди сиёсӣ низ доранд, метавонад ин қишри ҷомеаро боз ҳам сарҷамъу муттаҳид созад. Ба ин васила метавон инкишофи устувори мавқеи онҳоро дар ҷомеа боз ҳам қавитар намуд. Зеро таҳлилҳо нишон медиҳанд, ки ҷалби занон ва ҷавонон ва баланд бардоштани иттилоотнокӣ ва маърифатнокии онҳо барои муваффақ шудан ба устувории ҷомеаи бомаърифат ва рушдёфта вобаста ба вазъи муосири ҷомеаи ҷаҳонӣ амри зарурӣ маҳсуб меёбад.

Дар ин радиф, бо дарки амиқи нақшу мавқеи занон ва ҷавонон дар ҳаёти имрӯза ва рушди созандагии кишвар, боварии комил дорем, ки занон ва ҷавонон дар меҳвари сиёсати иҷтимоии давлат бо заковат, иродаву матонати қавӣ, дарки ҳадафҳои созандагиву бунёдкорона, ба хотири шинохти рисолати хеш дар шоҳроҳи рушду нумӯи кишвар садоқатмандона ва устувор қадам мезананд.

Сафаргул БУХОРИЕВА, сардори шуъбаи ҳуқуқ ва кор бо кадрҳои Кумитаи кор бо занон ва оилаи назди Ҳукумати Ҷумҳурии Тоҷикистон