Дар бозии мавқуфмондаи даври дувоздаҳуми чемпионати Тоҷикистон миёни дастаҳои лигаи олӣ тими "Ҳосилот"-и Фархор дар меҳмонӣ бар дастаи "Хуҷанд" бо ҳисоби 1:0 ғалаба кард.

Се холро ба дастаи ноҳияи Фархор Хайрулло Азизов овард. Ӯ дар дақиқаи 31 тӯбро вориди дарвозаи ҳариф кард. Баъд аз ин ғалаба "Ҳосилот" соҳиби 25 хол гардида, нисбат ба дастаи "Истиқлол", ки дар ҷои аввал аст, 8 хол кам дорад.

Имрӯз як бозии дигари даври дувоздаҳуми чемпионати мамлакат доир мегардад. Дастаи "Парвоз"-и ноҳияи Ғафуров дар майдони худ тими "Равшан"-и Кӯлобро қабул мекунад. Бахти ҳар ду даста дар мавсими имсола "нахандид" ва ҳоло дар ҷадвали мусобиқа аз ҳама охир ҷой гирифтаанд.