15-уми апрел бахшида ба таҷлили Рӯзи пойтахти Ҷумҳурии Тоҷикистон Ниммарафони XIII байналмилалии Душанбе баргузор гардид.

Мусобиқаи мазкур бо мақсади устувор намудани робитаҳои ҳамкорӣ бо бародаршаҳрҳо ва шаҳрҳои бо шаҳри Душанбе ҳамкории судманди иқтисодиву иҷтимоидошта баргузор карда шуд.

Нахуст иштирокчиёни чорабиниро Дилбар Одилзода, муовини раиси шаҳри Душанбе аз номи раиси шаҳри Душанбе шодбош намуда, зикр кард, ки Ниммарафони байналмилалии Душанбе нахустин мусобиқаи миллии кишвар мебошад, ки дар рӯйхати мусобиқоти Ассотсиатсияи байналмилалии марафонҳо ва давҳо дар масофаҳои дур ворид гардидааст.

Дар Ниммарафони XIII байналмилалии Душанбе варзишгарон аз кишварҳои Қазоқистон, Узбекистон ва Эфиопия, инчунин алоқамандону варзишгарони касбии шаҳру ноҳияҳои ҷумҳурӣ, шаҳрвандони хориҷӣ, аз қабили кормандони сафоратхонаҳо, намояндагони дипломатӣ, ташкилоту созмонҳои байналмилалӣ, ки дар Ҷумҳурии Тоҷикистон фаъолият доранд, ширкат варзиданд.

Ниммарафон аз назди Муассисаи давлатии “Наврӯзгоҳи пойтахт” тариқи хиёбони Ҳофизи Шерозӣ то гардиши собиқ дидбонгоҳи БДА “Чорбоғ”, бозгашт то кӯчаҳои Ҳофизи Шерозӣ-Карамов ва бурриши кӯчаи Карамов-хиёбони Рӯдакӣ то анҷом майдони “Дӯстӣ” дар масофаи 21 км 097 метр баргузор шуд.

Ҳамин тариқ, пас аз тай намудани масофаи зикргардида, ғолибон чунин муайян гардиданд:

Миёни мардҳо:

Ҷойи якум -  Шоҳрух Давлатов (Узбекистон);

Ҷойи дуюм - Тилаҳун Гирма (Эфиопия);

Ҷойи сеюм - Ҳелманов Рахимжан (Қазоқистон);

Ҷойи чорум - Самариддин Азимов (Тоҷикистон);

Ҷойи панҷум - Зуҳуршоҳи Наҷмиддин (Тоҷикистон);

Ҷойи шашум - Меҳроб Одинаев (Тоҷикистон).

Миёни занон:

Ҷойи якум - Тунгускова Екатерина (Узбекистон);

Ҷойи дуюм - Улиана Кузминова (Тоҷикистон);

Ҷойи  сеюм - Ғаффорзода Зулҳиҷҷа (Тоҷикистон);

Ҷойи  чорум - Раҷабмоҳ Абдуллоева (Тоҷикистон);

Ҷойи  панҷум - Баротова Маҳина (Тоҷикистон);

Ҷойи шашум - Маҳкамбекова Марҷона (Тоҷикистон).

Варзишгароне, ки ҷойҳои аз 1 то 6-умро байни мардон ва занон ишғол намуданд, дар алоҳидагӣ бо мукофотпулӣ иборат аз 39200 сомонӣ (3500$), 33600 сомонӣ (3000$), 28000 сомонӣ (2500$), 22400 сомонӣ (2000$), 20160 сомонӣ (1800$), 16800 сомонӣ (1500$) ва диплому ҷом дар толори Кохи Суруш қадрдонӣ гардиданд.

Ёдрас мешавем, ки Ниммарафони байналмилалии Душанбе соли сенздаҳум аст, ки бо мақсади рушду инкишофи намуди варзиши сабук, таъмини оммавияти варзиш, дарёфти беҳтарин марафончиён дар масофаҳои дур ва таҳкими дӯстию ҳамкорӣ миёни варзишгарони шаҳрҳои бо шаҳри Душанбе паймони бародаршаҳридошта, баҳри таҷлили шоистаи Рӯзи пойтахт гузаронида мешавад.

Аввалин бор Ниммарафони байналмилалии Душанбе дар масофаи 21 километру 97,5 метр бо иштироки варзишгарон аз 14 бародаршаҳри Душанбе ва беҳтарин давандаҳои Тоҷикистон моҳи апрели соли 2009 баргузор гардида буд.

Яҳё МАҲМАДНАБИЕВ, “ҶТ”