ВАРЗИШ
Сешанбе 07 Декабр 2021 02:25
8088
Варзиш дар ҳаёти гулдухтарони мо ҷойгоҳи намоён дошта, имрӯз дар ин соҳа шумори зиёде аз онҳо пайи машқу тамринанд. Яке аз чунин ҷавондухтарон Ҷаҳонгул Шарифова мебошад.

Ҷаҳонгул дар чанд риштаи варзиш фаъолияти босамар нишон дода, бо маҳорати баланди варзишӣ ва забондониаш на танҳо варзиши тоҷикро, балки забон, фарҳанг, ҳунар урфу одат ва таърихи моро ба ҷаҳониён муаррифӣ намудааст.

Ӯ соли 1995 дар ноҳияи Муъминободи вилояти Хатлон ба дунё омадааст. Юсуф Шарифов, ки худ устоди варзиш буд, фарзандонро дар муҳити варзишӣ ба камол расонидааст. Ин духтар дар байни панҷ писар ягона духтари хонавода буда, нерӯву ҷасорати мардонаро аз падар ва бародаронаш омӯхтааст.

Қаҳрамони мо мегӯяд аз овони хурдӣ ҳамроҳи падар ба дарсҳои варзишии донишгоҳ ва мактабҳо мерафту ба тарзи тамриномӯзии падар аҳамияти хоса медод ва ба монанди падар ва шогирдонаш усулҳои омӯхтаашро иҷро мекард. Ҳамин кунҷковӣ ва чолокиаш сабаб гашт, ки ба варзиш рӯ оварда, ин роҳи душвор ва дурахшонро роҳи худ интихоб намояд.

“Рӯз то рӯз меҳрам ба варзиш зиёд мегашту нозукиҳои чанд намуди ин соҳаро омӯхта, дар мусобиқаҳои ноҳиявию вилоятӣ иштирок ва ғолибиятҳоро ба даст меовардам. Дар аксари мусобиқаҳо рақибонам танҳо писарон буданд”, - гуфт ӯ.

Ҷаҳонгул пас аз хатми мактаби миёна мехост, дар Академияи милитсия таҳсил намояд, аммо бо сабаби надоштани шароити молиявӣ ба Донишгоҳи омӯзгории Тоҷикистон ҳуҷҷатҳояшро месупорад ва тариқи ройгон аз рӯи ихтисоси забони олмонӣ таҳсилро шурӯъ мекунад.

“Вақте мактабро соли 2013 хатм намудам, орзуям ба Академияи милитсия дохил шудан буд, аммо бо сабаби шароити молиявӣ натавонистам дар ин ҷода таҳсил намоям. Бароям дохил шудан ба Донишкадаи тарбияи ҷисмониро тариқи Квотаи президентӣ пешниҳод намуданд, аммо нахостам ва баъдан бо тавсияи як муаллимам ба Донишгоҳи омӯзгории Тоҷикистон ҳуҷҷат супоридам. Аммо мудом меҳрам ба варзиш буд. Муддате дар назди мураббӣ Матлуба Каримова аз намуди зӯрозмоии универсалӣ тамрин намуда, дар чанд мусобиқаҳои ҷумҳуриявӣ иштирок ва сазовори мақомҳои ифтихорӣ гаштам”, - мегӯяд Ҷаҳонгул.

Он машқу тамринҳое, ки Шарифова муддатҳо машғул гардид як ҳадафи муайян дошт, ин ҳам расидан ба орзуи деринааш, яъне рӯи майдони футбол омадаву ба футболи духтаронаи тоҷик саҳме гузоштан. Таҷрибаи аз дигар намудҳои варзиш гирифтааш барояш мактаби омадагӣ ба футбол буду саҳифаи деринтизори ҳаёташро боз намуд.

-Ман дар баробари дигар намудҳои варзиш ба бозии футбол низ шавқи зиёд дорам. Машғул гардидан ба намудҳои дигари варзиш ин замина ва омодагӣ ба футбол буд. Мехостам ба футболи духтаронаи тоҷик саҳми босазо гузоштаву онро ба ҷаҳониён муаррифӣ намоям. Соли 2018 ба дастаи футболи духтаронаи “Зебунисо” – и пойтахт собиқ “Динамо” омадам ва сармураббии даста Зебо Қосимова маро ба дастааш қабул намуда, дари иштирок дар мусобиқаҳоро бароям боз намуд, - илова намуд қаҳрамони мо.

Ҷаҳонгул то ҳол дар ин дастаи овозадор ҳунарнамоӣ мекунаду то ин замон дар мусобиқаҳои зиёд иштирок намуда, ба номи худ чандин голҳоро сабт намудааст. Муваффақиятҳои ӯро ба инобат гирифта, соли равон Кумитаи кор бо ҷавонон ва варзиши назди Ҳукумати Ҷумҳурии Тоҷикистон ӯро бо унвони Устоди варзиши Тоҷикистон қадрдонӣ намуд.

“Соли 2017 баҳри сайқал додани забономӯзӣ аз ҷониби донишгоҳ ба Олмон раҳсипор гардида, дар ин миён аз Испания ва Австрия низ дидан кардам ва ба мардуми ин мамлакатҳо аз таърих ва ободии кишварамон нақл намудам. Вақте онҳо оид ба кишвари азизамон суол мекарданд, ман барояшон бо сарбаландӣ аз ватани худ ва корнамоиҳои Сарвари маҳбубамон нақл менамудаму худро хушбахттарин инсон меҳисобидам”, - бо ифтихор афзуд Ҷаҳонгул.

Ӯ айни ҳол дар ҳайати дастаи футболи “Зебунисо” – и пойтахт ба мусобиқаҳои дарпешистода омодагӣ мебинад. Назараш ба оядаи футболи тоҷик нек буда, бо боварии комил изҳор медорад, ки дер нест он рӯзе, ки мардуми олам Тоҷикистонро ҳамчун кишвари рушдёфта дар соҳаи футбол эътироф намоянд.

Ҷаҳонгул нақша дорад, охирҳои соли равон дубора ба Олмон сафар намояду роҳи омӯзиш ва варзишро дар ин кишвар идома дода, ному шараф ва парчами Тоҷикистонро дар арсаи байналмилалӣ баланд бардорад.
“Мо – ҷавонон бояд созанда бошем. Ободии кишвар ва баланд бартоштани нуфузи он дар дасти насли ҷавон аст. Бинобар ин, ба ҳар як ҷавони худогоҳу ватандӯст муроҷиат менамоям, ки ҳарчи бештар ба омӯхтани соҳаҳои мухталиф бипардозанд ва Тоҷикистони соҳибистиқлоламонро беш аз пеш ба ҷаҳониён муаррифӣ созанд” - иброз намуд Ҷаҳонгул.

И. Амакҷонов, "ҶТ"


Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

Декабр 2021 c.