Ассотсиатсияи журналистони риштаи варзиши Тоҷикистон дар охири соли 2023 даҳ варзишгари беҳтарини солро эълон намуд. Дар қатори дигар варзишгарон Баҳодур Усмонов низ ба руйхати даҳгонаи мазкур дохил шуд. Ҳамчунин медали биринҷии Баҳодур Усмонов дар Чемпионати ҷаҳонии бокс натиҷаи беҳтарини варзишии тоҷик дар соли 2023 дар риштаҳои олимпӣ дониста шуд.

Бахшида ба ин дастоварди назаррас суҳбате намудем бо Баҳодур Усмонов, ки фарогири корномаи варзишии ӯст.

- Баҳодур бисёре аз варзишгарон 10-солаҳо талошу заҳмат мекашанд, то дар самти худ шинохта гарданд. Аммо ин кор барои шумо дар як муддати кутоҳ ба амал омад. Ин чӣ сабаб дошт?

- Ин ҳама дастовардҳо подоши заҳмату талошҳоест, ки дар ин роҳ кардаам. Барои муваффақият талош мебояд. Ҳар инсоне, ки мехоҳад дар дилхоҳ касбу кор мавқеи худро пайдо намояд, бояд дар ҳамон самт аз сидқи дил талош кунад. Зеро калиди муваффақият талош кардан ва боварӣ доштан ба худ аст.

- Пас аз 12 сол дар самти бокси кишвар таърихсозӣ кардед. Ин нуктаро чӣ гуна шарҳ медиҳед. Чӣ эҳсосе доштед баъд аз гирифтани медал?

- Ба даст овардани медал дар чунин мусобиқот, яъне дар Чемпионати ҷаҳонӣ орзуи ҳар як варзишгар аст. Ман низ аз ин қатор истисно нестам. Ба даст овардани медал бароям бисёр муҳим ва фараҳбахш буд. Тайёрии ман пеш аз мусобиқа хеле хуб буд ва ба худ боварӣ доштам. Ҳарчанд дар ин сабқат натавонистам, ки ба гирифтани нишони тилло даст ёбам, аммо хушҳолам, ки бо дасти холӣ барнагаштам. Дар ин рақобат медали биринҷиро ба даст оварда, теъдоди медалҳои хазинаи варзишии кишварро афзудам.

- Шумо ба ҷодаи бокс ҳамчун муштзани ҳаваскор ворид гаштед. Чӣ сабаб шуд, ки дар ин ҷода фаъолияти худро идома диҳед?

- Дилгармии ман ба бокс бештар ба бародарам алоқамандӣ дорад. Зеро бародарам худ варзишгар аз намуди бокс буд. Ман ҳамроҳи ӯ ба толори варзишӣ мерафтам. Бо дидани тамринҳои бародар ба бокс майл пайдо кардам. Ҳамин тавр, ба дунёи бокс ворид шуда, аз интихоби худ қаноатмандам.

- Чанд рӯз пеш дар Чемпионати Тоҷикистон оид ба бокс дар вазни худ мақоми аввалро касб кардед. Ин чандумин қаҳрамонии шумо дар чемпионатҳои Тоҷикистон аст?

- Ин 15-умин медали тиллои ман дар Чемпионатҳои Тоҷикистон мебошад. То ин замон дар чунин мусобиқот ба гирифтани 5 нишони тилло миёни наврасон ва 10 медали тилло миёни ҷавонон мушарраф шудаам. 15 маротиба қаҳрамони Тоҷикистон дар вазни худ мебошам.

- Дар Бозиҳои осиёӣ шумо яке аз он варзишгароне будед, ки ҳаводорони тоҷик медал интизор буданд. Чӣ сабаб шуд, ки ғайричашмдошт шикаст хӯрдед?

- Ман бо он рақиби худ маротибаи чорум буд, ки ба майдон мебаромадам. Се маротибаи аввал, ки ба сабқатҳои гуногун рост омада буд, ба он ҳарифи худ дастболо гашта будам. Аммо дар ин сабқат ғайричашмдошт мувоҷеҳи шикаст шудам ва аз идомаи сабқати Бозиҳои осиёӣ маҳрум мондам. Аммо аз ин шикаст руҳафтода нестам. Ин варзиш аст.

- Берун аз бокс Баҳодур ба чӣ кор машғул аст?

- Берун аз бокс бештар ба мутолиа машғул мешавам. Дар баробари ин, футбол низ ба ман писанд аст ва дар вақтҳои холии худ ба футбол машғул мешавам.

- Аз ҳама мавсими бобарор дар корномаи варзишиатон кадом аст?

- Ҳарчанд ҳама мавсимҳо дар корномаи варзишиам қобили қабул аст, аммо ба даст овардани аввалин роҳхат ба Бозиҳои олимпӣ бароям хотирмонтар буд. Ин воқеа барои ман дар мавсими 2019 - 2020 ба амал омад. Ман дар ин мавсим тавонистам дар Чемпионати Осиё ба гирифтани унвони қаҳрамонӣ даст ёбам. Ҳамчунин, дар чандин мусобиқаҳои байналмилалӣ соҳиби медал гардида, тавонистам якумин роҳхати Бозиҳои олимпии Токиё - 2020 -ро ба даст оварам.

- Дар шоми бокс низ ҳунарнамоии хубе доштед. Дар миёни ҳаводорони тоҷик баромад намудан чӣ ҳиссиёте дорад? Оё ин барои ғалаба таъсир расонда метавонад?

- Ман дар кадом сабқате, ки ба майдон бароям бештар барои ҳамватанон ва ҳаводорони худ сабқат менамоям. Ҳама вақт кӯшиш мекунам, ки онҳо аз ҳунарнамоии ман розӣ бошанд. Дар шоми бокс низ ин анъанаи худро давом дода, бештар кӯшиш кардам, рақобати арзанда ва ҷолиберо баҳри ҳаводорон ва ҳамватанон нишон диҳам. Хушбахтона, дар ин муҳориба низ ғалаба ба даст овардам.

- Барои роҳхат ба Бозиҳои олимпии Париж - 2024 чӣ нақшаҳо доред?

- Ҳанӯз барои иштирок дар ин рақобати бонуфузи ҷаҳонӣ роҳхат нагирифтаам. Айни замон тамоми саъю талоши худро ба он равона сохтаам, то дар сабқатҳои оянда ҳунарнамоии хуб нишон дода, роҳхатро ба даст оварам. Моҳи марти соли ҷорӣ дар Италия маросими роҳхатгирӣ ба Бозиҳои олимпӣ баргузор мешавад. Нақша дорам, ки дар он ҷо иштирок карда, роҳхати Бозиҳои олимпиро ба даст оварам.

- Қаблан таҷрибаи иштирок дар Бозиҳои олимпиро доред. Оё ин таҷриба барои муваффақият дар иштироки дигарбора сабаб шуда метавонад?

- Насиб. Ҳадафи ман низ иштироки дигарбора дар ин мусобиқаи бонуфуз ва ба даст овардани медали тилло мебошад. Баҳри расидан ба ин ҳадафи худ кори аз дастам меомадаро анҷом хоҳам дод.

- Дар ҷодаи худ бештар ба кӣ пайравӣ мекунед?

- Ба касе пайравӣ намекунам. Танҳо мехоҳам худам бошам.

- Чуноне дар сабқатҳо ба назар мерасад, робитаи шумо бо устодатон самимитар аз робитаи устодиву шогирдӣ аст. Оё барои шумо низ чунин нест?

- Бале чунин аст. Ман нисбати устоди худ эҳтироми хос дорам. Устодам Мирзо Шамсиев барои ман ба монанди падарам ҳастанд.

- Айни замон ба кадом сабқатҳо омодагӣ дида истодаед?

- Айни замон омодагиҳоро барои иштирок дар сабқатҳои дар пешбуда қавитар мекунам. Ба наздикӣ, аниқтараш моҳи феврал дар шаҳри Душанбе бокси касбӣ дорам, ки баҳри иштирок ва пирӯзӣ дар он тамрин намуда истодаам.

Ҳошим РАҲМАТУЛЛОЕВ, “ҶТ”