ВАРЗИШ
Ҷумъа 22 Октябр 2021 03:16
8132
Тайи 30 соли соҳибистиқлолии мамлакат бо заҳмату талоши варзишгарони кишвар беш аз 1800 маротиба Парчами давлатии Ҷумҳурии Тоҷикистон аз минбарҳои баланди мусобиқаҳои бонуфузи ҷаҳонӣ боло гардидаву Суруди миллии меҳан ифтихормандона садо додааст. Бешак, дар саргаҳи ҳамаи ин пирӯзиҳо сиёсати хирадмандонаву варзишпарваронаи Пешвои миллат муҳтарам Эмомалӣ Раҳмон меистад, ки ҷасорату матонат ва номусу ифтихори ватандории варзишгарони тоҷик ба он пайванди ногусастанӣ дорад.

Дар даврони соҳибистиқ-лолию фазои ваҳдати сартосарӣ варзишгарони далери кишвар аз хурд то бузург баҳри муаррифии Тоҷикистони азиз дар арсаи байналмилалӣ талош карда истодаанд. Аз ҷумлаи чунин варзишгарони ҷавону умедбахш, ки дар 8 – солагӣ унвони қаҳрамон ва Ҷоми ҷаҳонро дар риштаи варзиши шотокан каратэ - до SKIF соҳиб гардидааст, Мустафо Сироҷов мебошад.

Мустафо Сироҷов варзишгари наврас, дорандаи медали тиллои мусобиқаи қаҳрамонии ҷаҳон оид ба шотокан каратэ - до SKIF ва яке аз наврасони муваффақ буда, соли 2010 дар шаҳраки Ғарми ноҳияи Рашт ба дунё омадааст. Ӯ варзишро аз замони хурдсолӣ меомӯзад. Падараш ки яке аз дилбохтагони роҳи варзиш аст, фарзандашро аз овони хурдсолӣ ба иҷрои ҳаракату усулҳои варзишӣ ҷалб месохт.

“Чун худ ба варзиш рағбати зиёд дорам, фарзандам - Мустафоро низ пайваста ба иҷрои ҳар гуна амалу ҳаракатҳои варзишӣ ҷалб месохтам. Аллакай дар панҷсолагиаш ҳаракатҳои ҷолибе нишон медод, ки ҳамагонро дар ҳайрат мегузошт”, - гуфт падараш.

Ҳарчанд ки тамрин барои кӯдаке чун Мустафо дар толори варзишӣ мушкил буд, вале бо пур кардани синни шашсолагӣ ӯро ба мактаби варзишии ноҳия бурданд. “Вақте бори аввал Мустафоро барои тамрин ба мактаби варзишии ноҳия бурдам, мураббиёнаш тавсия доданд, ки ӯ ҳоло бисёр хурд аст ва ҳадди ақал баъди як-ду сол ба тамрин ҷалбаш созем. Аммо иҷрои ҳаракатҳои шавқовару ҷолиб ва ҷаҳишу усулҳои зебои Мустафо устодонро дар ҳайрат гузошту ӯро дар риштаи варзиши каратэ - до SKIF ба шогирдӣ қабул намуданд”- нақл мекунад падараш.

Пас аз як соли тамрин Мустафо пурра нозукиҳои риштаи каратэро омӯхт ва бори аввал дар ҳафтсолагӣ дар мусобиқаи ноҳиявӣ аз намуди шотокан каратэ - до SKIF иштирок намуда, сазовори ҷойи аввал гардид. Ин пирӯзӣ рағбати Мустафоро ба варзиш боз ҳам бештар намуд ва тамринҳоро ба таври моҳирона иҷро мекард. Дар ин муддат Мустафо ғолиби мусобиқаи минтақавию шаҳрӣ аз намуди шотокан каратэ - до SKIF байни наврасон гардида, соли 2018 дар мусобиқаи ҷумҳуриявӣ оид ба шотокан каратэ - до SKIF миёни наврасон медали тиллоро ба даст овард. Пас аз ин пирӯзӣ ӯ имкон пайдо намуд, то дар мусобиқаи байналмилалии Ҷоми ҷаҳон оид ба шотокан каратэ - до SKIF, ки дар Федератсияи Русия миёни 16 давлати ҷаҳон баргузор мегардид, иштирок намояд. Мустафо дар ин сабқати бонуфузи ҷаҳонӣ аввалин наврас аз Тоҷикистон буд, ки дар вазни 25 кг ба ҳама ҳарифони худ ғолиб омада, сазовори медали тилло ва ҷоми мусобиқа гардид. Қобили тазаккур аст, ки дар зарфи солҳои соҳибистиқлолӣ Мустафо яке аз аввалин нафароне мебошад, ки дар таърихи варзиши тоҷик бори аввал Ҷоми ҷаҳон оид ба шотокан каратэ - до SKIF миёни наврасонро ба ватан овардааст.

Дастоварди охирине, ки Мустафо дар корномаи варзишии худ сабт намуд, ин медали тиллои мусобиқаи ҷумҳуриявӣ оид ба шотокан каратэ - до SKIF миёни наврасон буд, ки моҳи июни соли ҷорӣ дар доираи Бозиҳои варзишии Ҷумҳурии Тоҷикистон баргузор гардид. Ҳарчанд Мустафо ҳоло миёни наврасон ҳунарнамоӣ мекунад, вале ӯ аллакай варзишгари муваффақ аст.

Қ.МАҲМАДҶОНОВ, “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
27 28 29 30 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Октябр 2021 c.