28 декабри соли равон дар шаҳри Душанбе ҷаласаи ҳисоботию интихоботии Ассамблеяи генералии Кумитаи миллии олимпии Тоҷикистон (КМОТ) баргузор шуд. Дар кори ҷаласа муовинони раиси КМОТ, роҳбарони федератсиҳои варзишӣ ва дигар намояндагони соҳа ширкат варзиданд.

Тавре аз дафтари матбуотии КМОТ иттилоъ медиҳанд, дар оғози ҷаласа ҳисоботи Кумитаи миллии олимпии Тоҷикистон дар солҳои 2017-2021 шунида шуд. Сипас аъзои Ассамблеяи генералии КМО Тоҷикистон роҳбарияти Кумитаро барои давраи солҳои 2022-2024 интихоб карданд.

Номзадии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷониби 15 ташкилоти узви КМО Тоҷикистон пешбарӣ гардида, Пешвои миллат якдилона Президенти Кумита интихоб шуданд.

Дар ҷаласа, ҳамчунин Раҳмонзода Абдулло (муовини аввали раиси Федератсияи тенниси Тоҷикистон ) ва Назаров Дилшод (раиси Федератсияи варзиши сабуки Тоҷикистон) ноибони Президенти КМО Тоҷикистон, Абдуллозода Муҳаммадшо (котиби генералии Ассотсиатсияи намудҳои зимистонаи варзиш) котиби генералӣ, Измайлова Екатерина (узви Комиссияи варзишгарони КМО Тоҷикистон), Қаландарова Шоҳида (узви Федератсияи ҷудои Тоҷикистон), Маҳамадализода Абдулло (котиби генералии Федератсияи чавгонбозии Тоҷикистон), Саидов Ҳусейнҷон (узви Федератсияи ҳендболи Тоҷикистон) ва Хайруллоева Нигина (котиби генералии Федератсияи каратэ-дои Тоҷикистон) аъзои дигари Кумитаи иҷроияи КМО Тоҷикистон барои давраи солҳои 2022-2024 интихоб гардида, нақшаи кор ва нақшаи буҷети Кумита барои соли 2022 тасдиқ шуданд.