Ё ӯ чӣ гуна тавонист миёни 42 давлати дунё соҳиби медали тилло гардад?

Аз 26 то 29 сентябр дар ҳамсоякишвари мо – Узбекис-тон Чемпионати ҷаҳон оид ба кикбоксинг баргузор гардид. Дар ин мусобиқа Тоҷикистонро 81 нафар варзишгар намояндагӣ карда, аз ин миён онҳо ба гирифтани 28 медали тилло, 16 нуқра ва 21 биринҷӣ даст ёфтанду бо натиҷаи назаррас ба Ватан баргаштанд. Перомуни баргузории мусобиқаи мазкур суҳбате анҷом додем бо варзишгари тоҷик Абдурасул Ҷабборов, ки дар мусобиқаи мазкур ба гирифтани медали тилло даст ёфт. Суҳбати мазкур дар баробари ташкил ва баргузории мусобиқа ҳамчунин корномаи варзишии Абдурасул Ҷабборовро низ дар бар мегирад.

- Сараввал шуморо барои ба даст овардани медали тилло аз Чемпионати ҷаҳон табрик мегӯем.

- Ташаккур!

- Ҳамчун иштирокчӣ дар мусобиқаи мазкур гуфта метавонед, ки он чи гуна баргузор гашт ва ба ғайр аз медал чи чизеро ба шумо дод?

- Чемпионати ҷаҳон оид ба кикбоксинг, ки дар Узбекистон баргузор гардид, дар сатҳи баланд ташкил ва роҳандозӣ гардида буд. Барои ман ҳамчун як варзишгар иштирок дар ин мусобиқа, ғайр аз он ки медали тиллоро соҳиб шудам, ҳамчунин имконияти хубе барои дарёфти таҷрибаи бештар дар соҳаи интихобкардаам буд. Зеро он мусобиқаи сатҳи ҷаҳонӣ буд ва ҳамтоёни мо низ аз кишварҳои гуногун иштирокчӣ буданд. Ба мо фурсат пеш омад, то таҷрибаи омӯхтаи ҳар кишварро берун аз он имтиҳон намоем.

- Барои ба даст овардани медали тилло ба мағлуб кардани чанд ҳарифи худ даст ёфтед?

- Барои ба гардан овехтани нишони заррин маро лозим буд, бо чор ҳарифи худ рақобат намуда, пирӯзӣ ба даст меовардам. Хушбахтона, ин имконият ба ман даст дод ва ҳар чор рақиби худро шикаст дода, медали тиллои мусобиқаро моли худ кардаму парчами кишварро дар мусобиқаи ҷаҳонӣ парафшон гардонидам.

- Барои нишон додани чунин натиҷаи назаррас дар Чемпионати ҷаҳон машғулият ва тамринҳои худро аз кай оғоз кардед?

- Машғулиятҳои мо барои иштирок дар мусобиқаи мазкур тақрибан як моҳ пештар аз Чемпионати ҷаҳон оғоз гардид. Аниқтараш мо тамринҳои худро аз 20 август оғоз намудем. Омодагӣ ба мусобиқа дар сатҳи хуб баргузор гашт ва ин заҳмати мураббиён ва худи варзишгарон буд, ки дар мусобиқа чунин натиҷа насиби мо гашт.

- Дар мусобиқаи мазкур бори чандум аст, ки ширкат мекунед?

- Ин иштироки аввали ман дар ин Чемпионати ҷаҳон набуда, қабл аз ин ду маротибаи дигар дар мусобиқаи мазкур иштирок карда будам. Маротибаи аввал, ки ман иштирокчӣ будам, ин мусобиқа дар шаҳри Истанбули Туркия баргузор гардида буд. Дар иштироки аввалини худ низ ба гирифтани нишони тилло мушарраф шуда будам. Аммо иштироки дуюм бароям чандон муваффақона анҷом наёфт. Медали тиллои имсола бошад, медали дуюми заррини ман аз Чемпионати ҷаҳон оид ба кикбксинг аст.

- Чуноне, ки маълум аст, шумо аллакай дар ҷодаи варзиш мавқеи худро пайдо намудаед. Гуфта метавонед, ки аз кай инҷониб ба варзиш машғул ҳастед?

- Ман муддати 10 сол мешавад, ки дар риштаи таэквондо машқу тамрин менамоям ва дар ин муддат дар чандин мусобиқаҳои сатҳи гуногун иштирок кардаам.

- Дар дохили ҷумҳурӣ натиҷаҳои шумо чӣ гуна аст?

- Дар дохили кишвар низ натиҷаҳои ман хуб аст. Тули 10 соли фаъолият дар риштаи варзиши таэквондо зиёда аз 10 маротиба тавонистаам унвони қаҳрамониро дар ин риштаи варзиш ҳимоя намоям.

- Чӣ боис гардид, ки шумо маҳз ин ҷодаро интихоб намоед? Ё маҳз чӣ шуморо дар дунёи варзиш нигоҳ дошт?

- Сабаби асосии ворид шудани ман ба варзиш ва махсусан фаъолият дар риштаи таэквондо ин модарам буданд. Ман бо хости модарам шомили дунёи варзиш шудам ва хостам худро дар ин ҷода бисанҷам. Ҳамин шуд, ки то ҳол онро идома дода истодаам.

Ман вақте шомили риштаи таэквондо гардидам, танҳо барои санҷиши худам буд. Аммо замоне машқу тамрин намуда, дар якчанд мусобиқаҳои дохили кишвар иштирок кардаму натиҷаҳои назаррас нишон додам, ба ин риштаи варзиш дилгарм шудам ва ҳамин тавр дар дунёи варзиш боқӣ мондам.

- Дар ин роҳ бештар аз ҳама кӣ шуморо дастгирӣ кард?

- Дар ин роҳ бештар аз ҳама маро падару модарам дастгирӣ карданд. Ҳатто ҳолатҳое буданд, ки ман хоҳиши идома додани варзишро надоштам. Аммо дар ин гуна мавридҳо онҳо ба ман рӯҳия мебахшиданд ва розиям мекарданд, то дигарбора ба варзиш дилгарм шуда, соҳаи худро тарк накунам.

- Дар оила танҳо шумо ба варзиш машғул ҳастед?

- Бале, дар оилаи худамон танҳо ман ба варзиш машғул ҳастам. Аммо, баъд аз он ки муддате ба варзиш машғул шудам ва натиҷаҳои назаррас ба даст овардам, писарони амакҳоям низ роҳи варзишро пеш гирифтанд. Ҳамакнун онҳо дар риштаи бокс тамрин мекунанд.

- Риштаи варзише, ки шумо онро интихоб кардаед, ба намуди варзиши Бозиҳои олимпӣ шомил намешавад ва орзуи бисёр аз варзишгарон ин ба даст овардани медали Бозиҳои олимпӣ аст. Чаро шумо намуди варзиши худро иваз накардед?

- Зеро айни замон дар ин навъи варзиш дӯстони зиёде дорам, ки аз аввали шомил шудан ба таэквондо бо онҳо будам ва нисбати ин ришта низ меҳрам зиёд гаштааст. Орзуи ман дар ҷодаи интихобнамудаам ин ҳарчи бештар ба даст овардани нишони заррин аз Чемпионати ҷаҳон ва парафшонии парчами кишвар дар арсаи байналмилалӣ аст.

- Ба ғайр аз таэквондо боз ба ягон навъи дигари варзиш шавқ доред?

- Бале. Ман дар баробари таэквондо ҳамчунин ба футбол низ шавқ дорам.

- Дар мавриди варзиш сухан гуфтем, аммо берун аз он сухан накардем. Шумо дар баробари варзишгар будан боз дар ягон макотиби олии кишвар низ таҳсил мекунед?

- Бале, ман дар баробари варзишгар будан, ҳамчунин дар курси 4-уми Донишгоҳи технологии Тоҷикистон дар ихтисоси технолог таҳсил мекунам.

- Пас аз хатми донишгоҳ нақша доред аз рӯи ихтисоси худ кор кунед ё тарҷеҳ медиҳед, ки дар варзиш боқӣ монед?

- Дар ҳоли ҳозир мехоҳам варзишро идома диҳам. Дар мавриди аз рӯи ихтисос фаъолият кардан ҳанӯз фикр накардаам.

- Каме дар мавриди нақшаҳои оянда-атон мегуфтед?

- Ман, чуноне дар боло қайд кардам, мехоҳам ҳарчи бештар дар мусобиқаҳои сатҳи ҷаҳонӣ иштирок карда, парчамбардори кишвар бошам. Пасон, дар оянда нақша дорам, фаъолиятамро ба ҳайси мураббӣ идома дода, насли наврас ва ҷавони кишварро ба тамрин фаро гирифта, аз онҳо қаҳрамон дар риштаи варзиши таэквондо омода намоям, то нақше дар рушди варзиши меҳан дошта бошам.

Ҳошим РАҲМАТУЛЛОЕВ, “ҶТ”