Дар давраи соҳибистиқлолӣ Ҳукумати кишвар футболро яке аз омили муттаҳидкунандаи миллату давлат дониста, барои рушд ёфтани ин намуди варзиш таваҷҷӯҳи хосса намуда, аз соли 2012 инҷониб як қатор иқдомҳои ҷадид роҳандозӣ гардида истодааст.

Дар ҷумҳурӣ аз соли 2012 марҳилаи нави футбол оғоз ёфт. Дар ин давра барномаи давлатии рушди футбол дар Тоҷикистон барои солҳои 2012 – 2016 қабул гардида, инчунин, варзишгоҳҳои замонавӣ бунёд гаш¬танд. Дар баробари ин, Фонди рушди футбол, лигаҳои миллӣ ва кӯдакону наврасон, Лигаи касбии футзал, Академияи Федератсияи футболи Тоҷикистон таъсис ёфт.

Федератсияи футболи Тоҷикистон бо дастгирии Ҳукумати ҷумҳурӣ баҳри тарғиби ҳаёти солим соли 2014-ро “Соли оммавияти футбол” дар кишвар эълон намуд. Ин иқдоми бузург дар баробари инкишоф ёфтани варзиш дар ҷумҳурӣ Тоҷикистонро миёни ҷаҳониён ҳамчун давлати варзишпарвар муаррифӣ намуд. Баъди роҳандозӣ гардидани ин иқдом собиқ президенти ФИФА Ёзеф Блаттер баҳри дидан намудан аз ин кишвари ҷавону варзишдӯст ба Тоҷикистон ташриф овард.

Ҳукумати кишвар барои боз ҳам рушду оммавӣ гардонидани футбол, мустаҳкам намудани пояи моддию техникии соҳа ва дар маҷмӯъ татбиқи сифатноки он Барномаи рушди футбол барои солҳои ‎2017-2020 қабул намуд, ки ин иқдом марҳилаи дуюми инкишоф ёфтани футбол дар кишварро инъикос мекунад. Дар ин марҳила ба фазои футболи кишвар боз якчанд дастаҳои нав ворид шуд.

Дастаи футболи ноҳияи “Шоҳмансур” дар асоси Барномаи рушди футбол барои солҳои 2017-2020, бо дастгирии Мақомоти иҷроияи ҳокимияти давлатии ноҳияи Шоҳмансур дар шаҳри Душанбе аз моҳи январи соли 2018 таъсис ёфта, роҳхати бозиҳои лигаи дуюми чемпионати кишварро дар минтақаи Душанбе ба даст овард.

Лигаи дуюми кишвар дар се минтақа - Суғд, Хатлон ва Душанбе тақсим мегардад, ки дар ҳар як минтақа зиёда аз 8 даста барои роҳхат гирифтани лигаи аввал рақобат мекунанд.

Абдуғаффор Маликов, сармураббии дастаи яккачини ноҳияи “Шоҳмансур”, мақсад аз таъсис ёфтани ин дастаро чунин ҳисобид: “Дастаи футболи “Шоҳмансур” бояд якчанд сол пеш таъсис дода мешуд. Аз сабаби набудани сарпараст нақша амалӣ нашуд. Ниҳоят бо дастгирии бевоситаи роҳбарияти ноҳияи Шоҳмансур, Ҳакимзода Низом аз дастпарварони собиқ тими “Локоматив” ва Мактаби махсуси кӯдакону наврасон оид ба футбол дар шаҳри Душанбе ин даста таъсис дода шуд. Ба даста футболбозони аз 15 то 22-сола даъват гардидаанд, ки ҳамаи варзишгарон сокинони ҳамин ноҳия мебошанд. Машқҳои таълимиву тамринии даста аз моҳи январи соли ҷорӣ дар бошгоҳи собиқ “Локомотив” гузаронида мешвад”.

Барои оммавияти варзиш бахусус намуди футбол имрӯз дар кишвар мусобиқаҳои гуногун роҳандозӣ мегарданд. Дастаи яккачини ноҳияи “Шоҳмансур” дар ин гуна мусобиқаҳои ҷумҳуриявӣ баромад намуда, соҳиби ҷойҳои намоён гардида истодааст. Даста пеш аз роҳ ёфтан ба лигаи дуюми кишвар дар минтақаи Душанбе, барои дарёфти Ҷоми раиси шаҳри Душанбе рақобат карда, ҷойи чорумро сазовор гардид.

Дар лигаи дуюми кишвар дар минтақаи Душанбе ҳашт даста барои роҳхат гирифтани бозиҳои плей-оффи лигаи якум мубориза мебаранд. Дастаи футболи навтаъсиси “Шоҳмансур” дар ин лига маҳорату малакаи баланд нишон дода, дар соли ҷорӣ қаҳрамони минтақаи Душанбе гардид.

Дастаро дар пеш бозиҳои интихобии лигаи аввал интизор аст. Сардори дастаи футболи “Шоҳмансур” Фирӯз Абдулқосимов мегӯяд, аз сабаби футболбозони даста маҳорати баланд нишон додан, мақсад гузоштем, дар лигаи аввал низ ҷойи намоёнро соҳиб гардем. “Воқеан ҳам, имрӯз футбол бештар аз як бозист. Албатта, ҳар рӯз шарту шароит дар кишвар барои оммавӣ гардонидани футбол бисёр хуб шудаистодааст. Барои рушди ин намуди варзиш Кумитаи кор бо ҷавонон ва варзиш, Федератсияи футболи ҷумҳурӣ ва дигар сохторҳои марбута ҳамасола дар шаҳри Душанбе майдончаҳои футболро бунёд намуда истодаанд, ки ин аз оммавӣ гардидани футбол дар кишвар дарак медиҳад. Ҳангоми ин гуна имкониятҳо будан, албатта ҳар як ҷавони кишвар ба варзиш таваҷҷуҳ менамояд. Ҳайати футболбозони дастаи “Шоҳмансур”, ки ҳама ҷавон мебошанд, новобаста аз навтаъсис будани тим дар мусобиқаи лигаи дуюм бозии хуб нишон доданд ва умед ҳаст бо ин ҳайат дар лигаи якум ҷойи назаррасро ишғол мекунад. Бешубҳа ин натиҷаҳо бе дастгирии роҳбарият ба даст намеояд. Мухлис дар футбол дувоздаҳум бозингар маҳсуб меёбад. Вақте футболбоз майдонро пур аз мухлис мебинад, дучанд нерӯву қувват мегирад ва кӯшиш менамояд, мухлисонашро аз майдон ноумед барнагардонад. Имрӯз дар кишвар чизи нигаронкунанда ин кам гардидани дӯстдорони футбол мебошад. Бештари бозиҳо дар майдон бе мухлист паси сар мегарданд, ки ин албатта ба манфиати кор нест. Хушбахтона, дастаи “Шоҳмансур” дар фаъолияти шашмоҳааш тавонист, то қадри имкон мухлисонашро пайдо намояд. Ва боварӣ дорам, дар лигаи аввал дӯстдорони ин даста зиёд мегардад”, - иброз дошт Фирӯз Абдулқосимов.

Имсол дар футболи наврасони кишвар таҳаввулоти нав дида шуд, ки ин бешубҳа аз натиҷаҳои Барномаи рушди футбол дар солҳои 2017-2020 мебошад. Наврасони 16-солаи кишвар дар Чемпионати Осиё-2018, ки аз 20 сентябр то 7 октябр дар Малайзия доир гашт, на танҳо медалҳои нуқра, ҳамчунин роҳхат ба Чемпионати ҷаҳон-2019 (U-17) дар Перуро ба даст овард.

Дастаи футболи “Шоҳмансур” дар дохили худ боз варзишгарони наврасро тарбия медиҳад, ки ин футболбозон метавонад, дар оянда номи футболи тоҷикро баланд бардоранд. Абдуғаффор Маликов, сармураббии дастаи яккачини ноҳияи “Шоҳмансур” зикр намуд, ки “новобаста аз навтаъсис будани тим футболбозони даста ба тими мунтахаби кишвар даъват гардида истодаанд. Дар ҳоли ҳозир ба ҳайати тими мунтахаби наврасони 15-солаи кишвар яке аз дастпарварони дастаи мо - Алиев Алиҷон даъват гардидааст, ки ин бозингар дар хатти ҳамла маҳорату малакаи хуб дорад. Бозии ин футболбоз рақобатҳои Лионел Мессии аргентинӣ, ки дар синни 14-15 солагиаш дар академияи “Барселона” фаъолият менамуд, ба хотир меорад ва умед аст, ки дар оянда яке аз футболбозони хуб ба воя мерасад”.

Дар воқеъ, имрӯз футбол дар ҷаҳон рақами яки варзиш маҳсуб меёбад. Ин намуди варзиш дар Тоҷикистон низ сол то сол рушд ёфта, дӯстдорону ҳавасмандони худро зиёд мекунад. Дастаи футболи “Шоҳмансур” тавонист дар кӯтоҳтарин вақт мавқеи худро дар футболи кишвар ёбад ва умед дорем, ки он фаъолияти худро дар лигаи аввал низ чунин идома медиҳад ва саҳми худро дар рушду инкишофи футболи тоҷик мегузорад.